Marietje Curiel a entrega carta pa Gobernador, preocupa cu Ombudsman no ta habri ainda

ORANJESTAD (AAN): Señora Marietje Curiel, a bishita DIARIO, como un ciudadano cu ta preocupa pasobra e servicio di Ombudsman no ta habri ainda.

   “Pa cuminza, mi ta contento cu Aruba a haya un Ombudsvrouw, despues di 17 aña cu e proceso a cuminza, pero e kier sa na unda e ta. Pueblo kier sa unda e ta y tambe ki dia Kinderombudsman ta bin.

 Pasobra oficialmente e Ombudsvrouw a wordo instala for di 1 di October 2024, pero e no ta funciona. Pueblo, no ta merece esaki. Mi a skirbi un carta na Gobernador, pasobra mi a tuma contacto cu Conseho di Sindicato na Hulanda y nan a bisa mi pa skirbi un carta na Gobernador, pasobra nan tambe ta haya e situacion straño, con bin e ta dura siete luna, mirando cu den otro paisnan nunca e ta dura asina largo, ni sikiera e por a habri un bali of un locket pa ricibi cartanan. Mi a haya un cita cu director di Gabinete di Gobernador.

 E carta a wordo ricibi positivamente, y e cita tambe. Mi a puntra nan den e carta con bin cu e no a habri ainda. Akinan tambe nan a duna mi e contesta cu berdad, con bin e ta dura asina largo, y e ta wordo yama pa un cita, y nan ta bay dune e carta cu mi tin. Nan a bisa mi cu nan ta bay bis’e pa cuminza haci algo. Pueblo merece miho”, señora Curiel a expresa, y a agrega cu el a duna Ombudsvrouw suficiente tempo pa habri, pero te ainda nada a sosode.

  El a expresa palabra di pabien na nos pensionadonan cu ta bay haya 250 florin di Reparatie Toeslag riba nan pensioen di SVb.

 “Pero tambe mi kier sa ki dia nos por bisa pabien na nos mucha y hobennan cu ta biba den pobreza, cu ta cana na caya cu zapato y pañanan kibra? Y ta bay scol sin come, pasobra no tin cuminda na cas. P’esey tambe carta ta bay pa Ombudsvrouw, pa nan situacion. Y Pesey, ki dia urgentemente Kinderombudsman ta bin? P’esey bendicion pa nos mucha y hobennan na Aruba”, señor Marietje Curiel a relata.

“Mi mes tin cartanan pa entrega na Ombusvrouw tocante igualdad pa San Nicolas, pasobra San Nicolas tin hopi bario den mal estado y Reino kier sa na unda e placa pa drecha San Nicolas, a bay”. 

Señora Curiel a conclui bisando cu pueblo tambe kier manda carta pa Ombudsvrouw.