Maneho di e cartera di Enseñansa y Deporte ta wordo traspasa pa minister Dangui Oduber

Prome Minister Evelyn Wever-Croes:

ORANJESTAD (AAN):  Durante conferencia di prensa di Gobierno di Aruba dialuna atardi, Prome Minister Evelyn Wever-Croes a informa comunidad di Aruba cu desde 28 di October 2024, e cartera di Enseñansa y Deporte lo wordo traspasa pa Minister Dangui Oduber.

            Prome Minister a indica cu den un conferencia di prensa anterior a informa cu su persona lo tuma e cartera aki temporalmente, esaki pa motibo cu ora parlamentarionan tuma e decision di manda un minister cas, no ta asina facil un otro minister lo tuma su cartera. E traspaso di un cartera ta tuma hopi re-organisacion mirando cu e lo kita hopi tempo di e minister su cartera actual. Specialmente un cartera manera di Enseñansa y Deporte, na unda cu e minister anterior a traha hopi duro y tin hopi trabou andando.

            Tambe, Prome Minister a splica cu na e momento cu a retira Minister Endy Croes, Minister Xiomara Maduro tabata den exterior, y despues di a bolbe bek Aruba, a sinta pa delibera cu ne, hunto cu Minister Dangui Oduber y Minister Rocco Tjon. Despues di deliberacion, Conseho di Minister a bay di acuerdo pa Minister Dangui Oduber tuma e cartera di Enseñansa y Deporte pa resto di e periodo di gobernacion.

"Mi ta lamenta si cu politiconan oponente a probecha di e situacion aki pa desacredita mi persona y ministerraad completo. Nan a insinua cu mi persona a tuma e cartera aki pa mi yuda un persona cu ta den investigacion, y pa mi interferi den dicho investigacion.

            E realidad ta cu berdad tin un investigacion andando den Stichting Sports Subsidie Aruba (SSA), pero mesora cu e investigacion aki a cuminsa, e director a wordo retira. SSA a haci nan investigacion y awor tur cos ta den man di Ministerio Publico (OM). E ta tristo si pa wak con oponentenan politico asisti pa cierto miembro di prensa ta prefera di descredita un persona enbes di busca e berdad. Mi ta reitera, ami no ta, y ami no por mete den investigacionnan di OM", Prome Minister a expresa.