E ultimo di 2025
ORANJESTAD (AAN): “Esfuerso conhunto dunando bon resultado”, ta locual cu Prome Minister di pais Aruba a expresa awe mainta durante momento cu prensa na e localidad asigna pa e siguiente accion di Baki den Bario.
Hunto cu Minister di Tursimo mr. Wendrick Cicilia y demas departamento envolvi cu e proyecto aki a invita e comunidad, muy particular e area di Simeon Antonio, Cas Paloma, Mahuma, Wayaca, Companashi, Santa Marta pa e ultimo accion di Baki den Bario pa 2025.
Prome Minister a indica cu esaki ta esfuerso conhunto di diferente partner den comunidad. Iniciativa di e accion di limpiesa aki (mensual) a hiba su costo y organizacion logistico, cual tabatin mester di sosten tanto financiero como den capacidad organizatorio. Mester a reenforsa y ta cu sosten di Ministerio di Turismo a logra esaki.
E intencion di Baki permanente den areanan strategico lo ta e meta pa 2026. Ta mirando e posibilidad di seis locacion pa aloca e bakinan aki, algo structura, accesibel y coordina, pa asina e comunidad por tin caminda pa deshaci di nan desperdicio 24/7.
Pa locual ta trata e accion di Baki den Bario di e fin di siman aki, lo bira e tereno net pabou di Arugas, na Barcadera. Tin un espacio amplio caminda lo tin e bakinan disponibel pa asina e pueblo por bin deshaci di nan sushi.
E ta un yamado na henter e comunidad, probecha e momento y temporada pa deshaci di desperdicio y haci e cas, e bario, scolnan, clubnan, compania limpi y bin tira tur sushi aki na Barcadera durante e accion di Baki den Bario.
Minister President, acompaña pa diferente instancia y departamento social lo drenta e bario di Kiviti tambe awe diahuebs durante e Accion di Bario semanal. Aki tambe lo bay topa cu e ciudadanonan di e bario pa asina mira kico ta e necesidadnan y con lo por bay duna un man.
Invitacion na Barcadera y vecindario, pa cuminsa prepara tur locual cu por durante siman y diasabra awo trece e desperdicio na e area asigna pa asina uni na e esfuerso grandi tumando luga pa un Aruba limpi y dushi pa biba riba dje.
For di 7:00 am te cu 11:30 am lo tin diferente departamento presente pa asina coordina e entrega y facilita e fluho di auto pa tur cos cana lihe y organiza.
