Luna di april ta decreta como luna nacional di conscientisacion contra abuso di mucha

Partido MEP:  Nos Muchanan, Nos Prioridad!

ORANJESTAD (AAN):  Luna di April a wordo decreta como luna nacional di conscientisacion pa loke ta abuso di mucha. Den conexion cu esaki, Parlamentario Evelyn Wever-Croes ta extende un invitacion na tur instituto, fundacion y instancianan gubernamental pa pone enfasis riba abuso di mucha y con por evita esaki.

            Gabinete Wever-Croes den gobernacion a tuma hopi paso pa purba limita y preveni abuso di mucha, y den caso tal cu e tuma luga pa por actua lihe. Na aña 2020, Gabinete Wever-Croes II a aumenta e ley di castigo di abuso sexual contra nos muchanan. Despues a fortifica e institutonan introduciendo e codigo di proteccion pa asina por detecta cualkier abuso contra nos muchanan di trempan y pa por actua lihe.

            “Nos muchanan ta wak nos como adulto pa duna nan cariño, stima nan y proteha nan. P’esey ban haci e luna aki uno nacional na unda tur ciudadano di pais Aruba ta reconfirma nan compromiso pa duna nos muchanan e cariño, e amor y e proteccion cu nan merece” Parlamentario Wever-Croes a expresa.