The content originally appeared on:
Diario
Durante ‘Semana de Integración Cultural y Lingüística con el Gran Caribe’
ORANJESTAD (AAN): E siman aki DIARIO a haya e tremendo noticia cu e linguista Arubiano Ramon Todd Dandaré ta bay ta como invitado special ofreciendo algun charla y tayer tocante Papiamento na Riohacha, Colombia, ciudad na unda el a nace.
E charlanan aki ta den cuadro di ‘Semana de Integración Cultural y Lingüística con el Gran Caribe’ en conexion cu celebracion di e di 479 aña di fundacion di Riohacha. E eventonan lo tuma luga for di 10 di september te cu 13 di september proximo.
Durante e periodo ey lo bay tin varios tayer di Papiamento, como tambe e charlanan ‘Historia del Papiamento’, cu lo tuma luga dia 11 di september den Centro Cultural del Banco de la República y ‘Las Lenguas Indígenas’, cu lo tuma luga dia 12 di september na Universidad de la Guajira.
Ramon Todd Dandaré ta biahando pa Colombia awe, despues di a pasa varios siman preparando pa asisti na e actividadnan aki, cu sigur ta di masha importancia no solamente pa difusion di Papiamento, sino tambe mirando e relacion y e union cu semper a existi entre Aruba y La Guajira.
Mester corda cu Todd Dandaré a ricibi un homenahe recientemente na Riohacha di diferente entidad y organisacion cu a reconoc’e, entre otro pa su meritonan destaca y e trabou briyante cu el a desplega como investigador, academico, docente, conferencista y gestor cultural di Gran Caribe.
Ta digno di menciona, manera e lingüista a laga sa yen di gratitud, cu pa e tayernan el a haya colaboracion valioso di Señora Swinda Schwengle di Cas di Papiamento y cu e charla ‘Las Lenguas Indígenas’ ta di su autoria conhuntamente cu Dr. Joyce Pereira, reconocido papiamentista Arubiano.
