Lifeguard Foundation preocupa cu hopi incidente cu morto tin riba lama

Michael Robert di Lifeguard Foundation:

• Proyecto di Lifeguard Foundation no ta hayando contesta 

ORANJESTAD (AAN) Matutino DIARIO a entrevista Michael Robert, di Lifeguard Foundation Aruba, cu tin e meta di preveni incidentenan den lama, cu hasta por cobra bida di hende.

  Michael a duna di conoce cu el a reuni cu algun instancia, y cu un ministerio mes, pero nan ta laga hopi di desea. “Nan ta pasa bo di un porta pa otro y djeynan ta manera tur cos ta muri. Nan ta bisa bo nechi den bo cara cu nan ta interesa den e proyecto pasobra e ta bon. Pero na dado momento bo no ta scucha nada mas di nan”, Michael Robert a señala.

   El a agrega cu incluso nan a sinta cu Oficina di Turismo di Aruba (ATA), cu a bisa cu di nan banda tur cos ta bay cana lihe, pero despues tampoco a scucha di nan. “Esey ta e resultado aworaki cu nos tin varios incidente riba lama y mortonan. Nos ta den e luna tres di e aña aki bayendo pa e di cuater, y por conta cuanto incidente y cuanto morto tin caba, riba lama”, Michael Robert a subraya.

   E kier a haci un yamada na doñonan di negoshi di watersport, pa stop di ta dehado y laga sikiera un of dos di su empleadonan pa pasa les di lifeguard.

  “Si bo no sa unda pa acudi por acerca su persona, y e ta pone den contacto cu e persona indica pa haya les. Esey ta yuda su persona, su compania y ta yuda Aruba mes”, Michael Robert a bisa.

   E proyecto a pega na dos caminda: e decision pa haya apoyo di gobierno y den e parti financiero. “Esaki pasobra na dado momento ATA a bisa cu e ta dispuesto pa yuda, pero despues di esaki tabata tin full un issue pa e tower, a bisa cu nan mester pone e tower riba beach”, Michael a señala.

   Como un ehemplo, el a menciona cu Baby Beach ta straight, y por wak diferente persona riba tur angulo di e beach. Pero na Eagle Beach no por wak si un persona ta hogando. “P’esey nos ta bisa nan pa nos bay un tiki mas cerca di e beach cu nos por tin mas angulo di e beach tambe.

   Y corda bon, e trahadornan tin cu core den e santo blanco te den lama. Pa bo yega te den lama, mas e trahado tin cu landa, busca e persona, depende con leu e persona a bay, y bin bek pa duna CPR ta hopi dificil”, Michael Robert a splica.