Minister Geoffrey Wever riba Dia Internacional di Consumidor
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever ta anuncia cu riba Dia Internacional di Consumidor 15 di maart 2026 e “Landsverordening bestuursrechterlijke handhaving consumentenbescherming” lo drenta na vigor. E ley aki lo fortifica di manera significativo e proteccion di consumidor y ta duna Aruba Fair Trade Authority (AFTA) un rol importante den supervision y aplicacion di e ley pa proteha derechonan di consumidor.
Proteccion di consumidor ta un pilar importante di e maneho economico di Gabinete AVP-FUTURO. Manera palabra den Programa di Gobernacion 2025- 2028 riba pagina 34 “lo introduci e ley di proteccion di consumidor pa proteha e consumidor y crea un mercado mas transparente y husto. Lo presenta e ley aki na Parlamento y implementa door di Aruba Fair Trade Authority”. Despues cu Parlamento a trata y aproba e ley riba 18 di juni 2025, via un decreto nacional di 27 di februari 2026, e ley di proteccion di consumidor lo drenta na vigor riba 15 di maart 2026, riba Dia Internacional di Consumidor.
E ley ta introduci un sistema di instrumentonan legal cu ta haci posibel pa actua mas lihe y mas efectivo contra abuso y violacion di derechonan di consumidor. AFTA lo haya e autoridad pa investiga violacionnan di derechonan di consumidor y si ta necesario tuma pasonan legal concreto contra companianan cu no ta cumpli cu e ley. Segun e ley, AFTA por entre otro duna instruccionnan na companianan pa coregi nan manera di haci negoshi, impone sancion y boet. Tambe AFTA por emiti advertencianan publico pa alerta consumidornan riba practicanan comercial cu ta contra e ley aki.
Durante 2025 gobierno den cooperacion estrecho cu AFTA a eherce e trabaonan preparativo necesario pa garantiza ehecucion di e tarea nobo aki di AFTA riba proteccion colectivo di consumidornan manera e ley ta exigi. Awor cu e ley lo drenta na vigor, un prome paso ta cu AFTA lo cuminsa cu entre otro informacion general pa publico y un investigacion di mercado. Den e prome fase, e informacion lo tuma luga via e website di AFTA y otro canalnan di informacion publico y despues via e ConsuLoket. E ConsuLoket ta un portal digital unda consumidornan lo por entrega keho. Implementacion di e ConsuLoket lo sosode mas despues den 2026.
Minister Geoffrey Wever ta indica cu e ley lo contribui na un mercado mas husto y transparente y ta proteha consumidornan ora cumpra den un negoshi of online. Tambe e consumidornan lo wordo protehi entre contra mercadeo falso, condicionnan di contract no rasonabel y contra e practica di manda productonan sin cu e consumidor a pidi esaki. E consumidor ta un partido importante den economia. Pesey ta introduci e ley aki pa fortalisa e posicion y proteha derechonan di tur consumidornan den economia. Reglanan transparente y supervision efectivo tambe ta contribui na un “level playing field” pa negoshinan segun minister Geoffrey Wever.
Minister Geoffrey Wever ta gradici Gabinete AVP- FUTURO, AFTA y DEZHI cu a haci posibel pa e Ley pa proteccion di consumidor bira un realidad. Cu esaki, riba Dia Internacional di Consumidor 15 di maart 2026 Aruba ta dal un paso concreto den proteccion di derechonan di tur consumidor.
