LATAM Airlines ta amplia servicio Lima–Aruba cu vuelo diario

Cuminsando na april 2026

ORANJESTAD (AAN): Conectividad aereo entre Aruba y Sur America ta sigui crece mientras LATAM Airlines ta aumenta su servicio entre Lima (LIM) – Aruba (AUA) di cinco vuelo pa siman pa operacion diario cuminsando na april 2026. E expansion aki ta fortalece aun mas e conexion di Aruba cu e mercado Peruano mientras tambe ta mehora acceso pa e red mas amplio di LATAM den Suramerica.

E aumento ta representa dos vuelo adicional pa siman, añadiendo 348 asiento extra pa siman for di Lima pa Aruba. Cu e expansion aki, e ruta lo ofrece mas cu 1.200 asiento pa siman cada direccion, representando un aumento di mas o menos 40% compara cu e aña anterior den capacidad di asiento entre Lima y Aruba pa aña 2026.

A base anual, e frecuencia adicional lo genera mas cu 18.000 asiento adicional den e mercado Peru–Aruba, apoyando e crecimento continuo di bishitantenan for di Sur America y reenforsando e posicion di Aruba como un destino principal den Caribe pa bishitantenan di e region.

Operando cu avion Airbus A320, e ruta ta conecta Aruba cu e hub di LATAM na Lima, brindando acceso facil cu un escala pa varios ciudadnan importante den Sur America incluyendo Santiago, Buenos Aires, Montevideo y Quito.

“E decision di LATAM pa amplia e ruta Lima–Aruba pa vuelo diario ta refleha e demanda fuerte pa biahe entre Peru y Aruba,” asina Jo-Anne Arends, Aviation Business Development Executive na Aruba Airport a duna di conoce. “E aumento aki ta fortalece conectividad aereo di Aruba cu Sur America y ta mustra e confiansa continuo cu aerolineanan tin den nos destino.”

“Pa Aruba, e relacion comercial cu LATAM Airlines ta importante. Como un aerolinea di legado, nan ta transporta un segmento di biahero di hopi balor den henter region Latino Americano, reenforsando e importancia strategico di e conexion aki cu e mercadonan di Perú, Chile, Argentina y Brazil. Frecuencia diario lo haci e conectividad aki mas fuerte, reenforsando e relacion di Aruba cu e region y contribuyendo na diversificacion global,” asina Ronella Croes, CEO di Aruba Tourism Authority, a enfatisa.

Fortaleciendo asociacionnan na Routes Americas 2026

E anuncio ta sigui despues di reunionnan recien entre Aruba Airport Authority, Aruba Tourism Authority y LATAM Airlines durante Routes Americas 2026 na Rio de Janeiro, e foro principal den e region pa desaroyo di servicio aereo unda aerolineanan, aeropuertonan y autoridadnan di turismo ta colabora pa amplia conectividad global.

Durante e evento, LATAM Airlines Group a ricibi e Airline Partnership Award, reconociendo e colaboracion fuerte entre e aerolinea cu Aruba Airport y socionan di turismo pa desaroya y crece conectividad exitosamente. E premio ta destaca compromiso di LATAM pa asociacionnan strategico, desempeño sosteni di rutanan y iniciativanan conhunto cu ta stimula demanda di pasaheronan.

E crecemento continuo di e ruta Lima–Aruba ta refleha e asociacion fuerte entre LATAM Airlines, Aruba Airport Authority y Aruba Tourism Authority pa amplia conectividad entre Aruba y Sur America.

Ampliando conectividad cu Sur America

LATAM Airlines Group ta e grupo di aerolinea mas grandi di America Latina, sirbiendo mas cu 160 destinacion den casi 30 pais na mundo. Mediante su hubnan na Lima, Santiago, São Paulo y Bogotá, e aerolinea ta brinda conectividad amplio den henter Sur America y tambe cu destinacionnan den Merca, Europa y otro regionnan.

E decision pa opera vuelo diario henter aña ta sigui apoya e strategia di Aruba pa fortalece conectividad aereo y amplia su alcance den e mercado Sur Americano, mientras ta reforsa e rol di Aeropuerto Internacional Reina Beatrix den conecta Aruba cu mercadonan internacional clave.