Lansamento di Inventario Nacional di Patrimonio Cultural Intangibel

Comision Nacional di Patrimonio Cultural Intangibel Aruba

ORANJESTAD (AAN): Pa proteha y preserva nos identidad cultural pa e generacion actual y futuro, un comision nacional a wordo estableci pa traha riba un inventario nacional di patrimonio cultural intangibel cu ta rekeri proteccion urgente.

E comision ta consisti di representantenan oficial di UNESCO, Departamento di Cultura (DCA), Archivo Nacional Aruba (ANA), Biblioteca Nacional Aruba (BNA), Museo Archeologico Nacional Aruba (MANA) y Union di Organisacionnan Cultural Arubano (UNOCA).   

E inventario aki ta forma parti di e esfuerso nacional pa identifica, documenta y promove nos tradicion, custumber, expresion y conocemento cultural cu ta den risico di disparce si nos no tuma accion inmediato.

E comision tin como mision principal: haci un inventario completo di e elementonan cultural cu ta vulnerabel, coordina cu organisacionnan cultural, bario, portado di tradicion y comunidad den su totalidad.

Tambe, e comision tin como encargo, presenta recomendacion pa proteccion y promocion di e patrimonio cultural intangibel di Aruba.

Lansamento di e inventario nacional ta un acontecimento importante pa Aruba den su compromiso cu UNESCO y den nos obligacion pa preserva nos herencia cultural.

Pa e motibo aki ta haci un yamada na tur miembro di comunidad pa comparti su conocemento, tradicion y aporte pa hiba e inventario aki na un nivel completo y representativo.

Por yena e encuesta mediante e siguiente link:  https://form.jotform.com/260183329941055

Pa mas informacion, por tuma contacto cu Comision Nacional Patrimonio Cultural Intangibel Aruba via email: This email address is being protected from spambots. You need JavaScript enabled to view it. of pa medio di e pagina di Facebook: Patrimonio Cultural Intangibel di Aruba como tambe Instagram: pci.aruba.

Patrimonio cultural ta e raiznan di nos pueblo. Hunto nos por preserv’e y fortific’e!