LandsRecherche a cuminza investiga morto misterioso di detenido den cel na Warda di Macuarima

Famia ta haya e caso aki hopi straño

• Marduga nan a djis yama Polis pa yuda calma e homber... 

ORANJESTAD (AAN): Tabata riba Diahuebs 1 Januari 2026 pa mas o menos 7:40’or di mainta durante un control den celnan na Warda di Polis Santa Cruz, agentenan a bin topa cu un detenido masculino kende a dicidi na comete algo extremo, di pone fin na su bida.  El a nota cu e detenido Ruben Dario Conde di 45 aña di edad, no ta reacciona.

   Di biaha el bati alarma door di informa Chef van Dienst, y na su turno ta pone Central di polis na altura.  Aki segun e draaiboek, Central na su turno a pone tur instancianan concerni na altura di esaki.  Esey a inclui tambe LandsRecherche, y tambe team forensic di BFTO, y Polis Tecnico.

   Bureau Slachtofferhulp a presenta tambe pa asina guia e famia den e momento lamentable aki.

   Mas detaye:  E victima Ruben ta naci na Colombia dia 10 di Februari 1980, a caba di celebra cambio di aña y a bay su cas alrededor di 3:30 am bay drumi na un cas den bario di Verano, cu ta keda den area pabao di Sero Biento.

   Banda di 4:00 am den su bario, hendenan a tira pagara y esaki a spanta Ruben, kizas el a kere cu ta un sorto di tiramento ta andando.  El a bula for di bentana di cas, y despues a manera cuminza haya gana di destrui tur cos den cas.   Asina famia a yama Polis, pensando cu agentenan lo bin papia cu Ruben pa calme.  Pero ora cu famia a mira con Polis a cuminza actua cu man duro contra e persona, nan a hasta pidi pa cancela e asistencia, y nan a mustra di ta dispuesto pa keda cu e ciudadano Ruben na cas y lage trankiliza.

    Pero Polis no a haci caso di famia, y nan a bay cu ne pa Warda di Polis na Santa Cruz.

   Mainta banda di 9:00 am ora cu a ricibi yamada di Bureau Slachtofferhulp, mesora a pensa cu Ruben lo a muri.

   Esaki ta numeroso caso unda ciudadanonan ta pidi asistencia di Polis pa yuda calma un familiar cu kizas a wak demasiado den e boter, y na final e ta termina cu morto.  Casonan grandi asina ta conoci pa e.o. loke a pasa na Aruba na e.o. dilanti cas di famia na Rooi Koochi, y tambe cas di famia na Sero Pita.  Unda cu famia a yama Polis djis pensando cu lo yuda calma un persona... pero na final ta mal noticia a ricibi.

   Famianan e biaha aki ta haya e morto di Ruben Dario Conde uno misterioso, y nan ta exigi splicacion di loke a socede.  Awor cu LandsRecherche a wordo envolvi, lo por spera cu nan lo pasa check tur testigo den e caso aki.  Den pasiyo dilanti Celnan for di hopi decada caba tin camera instala, pero no ta conoci si acaso esnan na Santa Cruz lo ta capta tur cos te paden di cel.