Klapchi ta bunita pa e ser humano pero pa nan e ta ta un caos y confusion total

Tene cuenta cu mascotanan y animalnan cu ta biba riba caya

ORANJESTAD (AAN): Ya pa algun dia caba, nos a cuminsa scucha zonido di klapchi rond di Aruba. Un tradicion cultural cu hopi di nos ta hiba den nos curason. Pero mientras cu e ser humano ta disfruta di e magia di color anochi y zonido di pagara durante dia, nos animalnan ta biba un storia hopi diferente, un realidad tristo pa nan. 

Cada aña, tanto veterinarionan, gruponan di rescate y ciudadanonan preocupa, ta prepara pa e ola anual di mascotanan cu ta drenta panico y animalnan riba caya desorienta. Cachonan cu ta tembla, pushinan cu ta sconde den cualkier skina, y animalnan sin hogar cu ta core subi caya den trafico of ta disparce pa varios dia. Loke pa nos ta un celebracion, pa nan ta un caos y confusion total. 

Esaki no ta pa punta dede riba niun hende, tradicion ta importante, y klapchi pa hopi tempo ta den nos ritmo cultural. Pero si, nos comunidad por ta mas consciente y enfoca mas riba siguridad y trankilidad di nos mascotanan y animalnan cu ta biba riba caya. 

Algun sugerencia ta pa mantene mascotanan den cas, cera bentana y cortina, y compaña nan cu amor y pasenshi. Duna nan medicamento pa trankilisa nan.Cende radio y pone coy hunga pa nan. Microchip tambe ta hopi importante, pa asina por tin un record tambe di animalnan perdi. Pa animalnan cu no por trece paden, tapa nan haula cu un tela diki. Esakinan ta pasonan chikito pero ta pasonan cu ta yuda nos mascotanan. Pasonan cu ta revela empatia. 

Mientras cu Aruba ta yama bon bini na un aña nobo, laga nos celebra cu alegria, honra nos tradicion, pero laga nos expande nos circulo di compasion y responsabilidad pa tur ser viviente cu ta parti di nos isla, nos mascota y animalnan riba caya.