Entrevista cu dr. Wilmer Salazar, Consehero Medico DVG:
ORANJESTAD (AAN) – Den entrevista exclusivo cu DIARIO, Dr. Wilmer Salazar, Consehero Medico di DVG, a elabora tocante e malesa cu ta afectando varios mucha na Merca, Europa y Latinoamerica, cu ta un hepatitis di origen desconoci.
Salazar ta cuminza pa defini kico e termino Hepatitis, ta nifica.
Hepatitis: “Palabra cu ta bin di e idioma Griego hepar = Higra y itis = inflamacion, y cu den termino medico ta nifica inflamacion di higra.
For di algun siman atras, e mundo medico a hala atencion riba notificacion di un brote straño di hepatitis agudo cu ta afecta mucha. Te aworaki e causa no a wordo determina y ainda ta investigando pa saca afo su origen.
Prome casonan a cuminsa wordo reporta na Inglatera (UK) for di januari 2022, despues otro paisnan europeo a cuminsa raporta y recientemente Merca tambe tin casonan cu ta den investigacion.
Na nivel mundial a presenta un promedio di 450 mucha cu e tipo di hepatitis agudo aki y autoridadnan mundial y regional di salud ta evaluando si e casonan cu a keda detecta ta presenta algun caracteristica clinico cu lo por ta diferencia di e casonan di hepatitis comun, y si e cantidad di casonan ta representa of no un aumento significante, compara cu casonan cu a wordo detecta den añanan anterior”, Dr. Wilmer Salazar a indica.
El a sigui splica cu causa di e malesa aki ainda no ta conoci y ta sigui bao investigacion. P’esey centronan medico di investigacion reconoci ta trahando intensamente pa determina si e casonan tin un origen viral, bacterial, fungus, productonan quimico of toxinanan, etc.
Na mes momento ta haci un yamado pa mantene comunidad calmo pa e tipo di malesa aki pa motibo cu su incidencia ainda ta hopi abao.
Intension di e publicacion aki ta pa informa y educa nos comunidad, pa ta na altura riba loke ta pasa den ramo di salud mundialmente y no cay den noticia falso (fake news). E noticia aki ta actualiza, skirbi 17 di Mei 2022.
Kico ta Hepatitis agudo infantil di origen NO conoci?
Dr. Wilmer Salazar a defini kico ta Hepatitis agudo infantil. “E ta inflamacion di e higra den mucha entre 0 cu 16 aña, cu ta causante di e malesa ainda ta desconoci. E casonan aki di Hepatitis agudo infantil a haya interes di organizacionnan di Salud mundial ora cu na Inglatera (UK)e incidencia di casonan a surpasa e linea di incidencia ‘normal’ cu ta wordo reporta, y tambe comportacion di e malesa cu por bira grave (10% di muchanan afecta a rekeri transplante di Higra)”.
Den un siguiente articulo, Dr. Salazar ta referi na e situacion actual di e malesa aki na mundo, claro, incluyendo Aruba.
