Jennifer Arends-Reyes ta drenta 2026 cu enfoke riba husticia social, turismo y bienestar

ORANJESTAD (AAN): Como Miembro di Parlamento y lider di fraccion di AVP, Parlamentario di Partido di Pueblo Arubano (AVP),

ta desea tur ciudadano di Aruba un feliz aña nobo 2026, yen di salud, union familiar y hopi progreso pa nos isla.

  “Nos ta drenta un periodo nobo cu renobacion di speranza y compromiso. Mi lo sigui traha cu entrega pa bienestar di pueblo Arubano y pa fortalece nos institucionnan. Un Aruba mas husto y prospero ta e meta principal cu mi lo sigui traha p’e cu determinacion,” Arends-Reyes a indica.

   Durante 2025, nos a logra resultado importante manera e aumento di pension pa nos grandinan y e ahuste den salario pa nos docentenan. Esakinan ta logronan concreto cu impacta bida real di hendenan, y nos ta sigui traha pa mas mehoransa den 2026.

   Turismo ta e motor di nos economia. Mi ta kere cu un enfoke riba turismo di calidad y sostenibilidad ta clave pa e futuro. Nos pueblo ta trahado y hospitalario — nos mester sigui inverti den nan formacion y capacitacion, pa nos por brinda un servicio di nivel halto y mantene Aruba competitivo den e mercado global.

   Siguridad den trafico ta birando un tema cu nos tin cu pone hopi enfasis riba dje. Aruba no por sigui asina cu tanto casonan lamentable. Tambe como comunidad nos mester uni pa yuda otro cu por ta pasando den momentonan dificil y di soledad pa por busca ayudo.

   Parlamentario Arends-Reyes: “Como lider di fraccion di AVP, mi kier reafirma cu nos compromiso pa 2026 ta basa riba dialogo, responsabilidad y accion concreto. Hunto cu nos partnernan den Parlamento, Gobierno y comunidad, nos lo sigui traha pa construi un Aruba unda bienestar, oportunidad y husticia social ta centra den tur decision.”

   Por ultimo, e ta gradici e confianza di pueblo di Aruba y ta invita un y tur pa drenta e aña nobo cu union, respet y fe cu un responsabilidad y  compromiso comparti.