Jennifer Arends-Reyes cu hopi optimismo kier bo voto pa un cambio

E candidata di AVP ta mira cu enseñansa ta den decadencia

ORANJESTAD (AAN): Esaki ta e siman culminante pa pais Aruba caminda nos lo sali y eherece nos derecho di voto. Un voto sagrado, un voto conciente pero mas ainda un voto pa e persona cu abo kier wak den parlamento y cu ta e persona cu abo ta confia pa eherce bo voz den e organo di mas halto di pais Aruba. E voto di confianza pa hiba Aruba den un otro direccion, e direccion di prosperidad y progreso pa un y tur na Aruba.

   Jennifer Arends- Reyes, Candidata #6 riba e lista di AVP, a bin ta hiba un campaña serio, transparente, honesto pero tambe un campaña liber di promesanan falso cu no por cumpli. Jennifer a percura, manera semper el a bin ta haci, pa drenta den nos comunidad y bishita cas pa cas pa combersa y scucha kico ta realmente e dolor cu ta biba den nos comunidad. E preocupacion di cada famia, mama y tatanan soltero, e stranhero cu ta traha duro y kier bay dilanti, e studiante cu kier un futuro briyante y esnan den sector di turismo un mihor bida.

   Core un campaña pa 2 luna largo no ta facil, e tin su reto cual ta e factor tempo pero Jennifer a sa di haya e sosten y apoyo for di su ekipo y hunto nan a drenta e comunidad. Dianan largo, anochinan duro pero tur pa un solo proposito, pa 'bolter cos' y hiba Aruba den un direccion nobo, un aire fresco den politica pa Aruba. Hopi ta esnan cu a perde speranza, of tin e duda pa un partido tradicional pero Jennifer a sa di combersa y hiba e mensahe pa vota pa un gobierno di experencia, e ta un cadidata cu ya tin un trayectoria den e mundo di politica y tabata miembro den parlamento pa dos periodo cu tantisimo cambio di ley tras di su nomber y un sin fin di iniciativanan. Un hoben profesional cu tin Aruba na pecho pero mas aun tin enseñansa y turismo den su curason.

   Nos systema di enseñansa ta den un decadencia. Nos muchanan y hobennan merece mucho mas cu locual tin awor pa ofrece, mester evita cu ta perde interes den estudio y cu lo por conduci na drop outs. Nos Maeastronan mester worde trata cu mas respet y duna nan e tools y material cu nan mester pa asina modernisa e systema di Enseñansa, cual ta encera tambe un mihor salario pa nos maestronan. Nos mester por crea futuro lidernan di mañan y esey ta cu un mihor systema di enseñansa so por logra esaki.

   Turismo ta enfrentando un cambio y ta toca Gobierno pa alinea cu e direccion nobo cu Oficina di Turismo ta hibando turismo. Un cambio cu un mensahe fuerte riba concientisacion y conservacion di nos naturlaesa pero manteniendo e calidad di e turismo cu Aruba mester atrae. Como nos unico pilar economico nos turismo ta creciendo pero esnan trahando den e sector aki no ta mira e fruto, alcontrario ta pidiendo pa esnan den sector traha mas hopi, entrega mas dia di trabao pero e compensacion no ta den balansa. Pa nos mantene e calidad di turista riba nos isla, nos servicio y amabilidad tambe mester ta di un nivel halto y esaki bo lo haya ora bo trata bo miembronan di ekipo cu respet y dunanan e compensacion husto y balansa.

   E reto ta grandi pero nada no ta spanta Jennifer pa lora manga y traha pa su pais. Aruba mester ta dispuesto pa acepta e cambio y hunto cu bo voto nos lo logra esaki. Un voto pa Jennifer ta un voto pa un enseñansa prometedor y un turismo stabiel cu beneficio pa tur hende.