James Hepple a repasa e contribucion di Henny Eman den turismo

ORANJESTAD (AAN): Diamars, durante e ceremonia di desvelo di e nomber di Henny Eman Boulevard, sr. James Hepple, CEO di Tourism Analytics,

a repasa e contribucion elocuente di Henny Eman den e sector di turismo na momento cu Henny a haya e responsabilidad pa saca Aruba for di un di e tempestadnan economico significativo pa Aruba.

Cu ciere di refineria LAGO na 1985 y inicio di nos Status Aparte, na januari 1986, Henny mester a goberna Aruba den un crisis enorme cu tabata reina cu e ciere di Aruba su mayor pilar economico. Cu e entrada di e tan anticipa Status Aparte, e expectativanan den comunidad tabata hopi halto, pa e direccion den cual Aruba lo mester nabega. E ciere di Lago na 1985, a hinca Aruba den un recesion profundo y no tabata mustra cu lo sali for di esaki sin mas. E tempo ey, turismo como di dos pilar economico, no tabata florece ainda y tabata draai cu alrededor di 200 mil turista pa aña. Ademas e cantidad di turista for di Venezuela cu tabata conoci pa ta di alto rindimento, tambe a cay drasticamente.

Mientras mundialmente turismo internacional tabata mira crecemento enorme, Aruba su turismo tabata stagna. Cu esaki den mente, ta remarcabel con Henny Eman tabatin e vision cu un expansion exponencial di e sector di turismo lo ta e miho opcion pa Aruba. Henny no tabata e prome pa reconoce e potencial turistico di Aruba, pero si e prome cu a "make it happen". E decision e tempo ey no tabata solamente riba e cantidad di turista cu kier atrae, pero pa inverti den un infrastructura y producto y pa implementa campañanan di mercadeo dirigi riba e consumido afluente, cu un entrada halto y poder di compra halto for di un mercado stabil manera e parti nor este di Merca.

Aruba tabatin e imagen di ta un destinacion caro, y cu e deseo pa saca Aruba for di e crisis, Henny a mira e necesidad pa atrae turistanan cu entrada halto pa garantisa maximo beneficio. Henny no a solamente a scoge turismo sino a crea e cuadra legislativo pa haci Aruba mas atractivo pa companianan hotelero di renombre pa bin establece mientras ta mantene nos identidad cultural. E strategia aki a resulta den un exito rotundo mirando e crecemento den turismo cu a aumenta di 207 mil turista na 1985 pa 619 mil den apenas 10 aña.

Cu e crecemento di turista procedente di Merca cu a mas cu redobla for di 150 mil pa 345 mil turista Mericano den e mesun periodo, historia a demostra cu lidernan grandi ta comparti e mesun cualidadnan, nan ta mira e realidad y ta nenga di wordo restringi pa e realidad aki. Hepple a haci referencia na ex Prome Minister di Singapore Lee Kuan Yew cu a transforma Singapore den un pais Asiatico super desaroya y lider mundial den finansas, comercio y tecnologia. Tambe a referi na Sheik Rashid bin Saeed Al Maktoum cu tabatin e vision pa crea e Dubai di awe.

Henny Eman tabata resona e palabranan di George Bernard Shaw cu Robert Kennedy a haci popular, esta "algun hende ta wak cosnan manera nan ta y ta puntra dicon, ami ta soña cosnan cu nunca tabata y ta puntra dicon no". Lidernan manera Henny Eman no a solamente maneha economia, nan a re-imagina e identidad di nan pais y a implementa tur locual ta necesario pa haci e soño aki realidad.

Turismo tin su ciclonan, ta dinamico y ta rekeri adaptacion continuo. Mester sigura cu e vision di Henny no ta envano, y mester haci tur posibel pa saca lo mas posibel na bienestar di Aruba.