Intercambio di informacion financiero ta obligatorio entrante 21 di maart 2025

Maneho di Boet ta aplicabel

ORANJESTAD (AAN):  Institutonan financiero manera banconan y cierto personanan cu ta cay bou e ley "Ordenansa nacional pa cu asistencia fiscal internacional” (Landsverordening Internationale Bijstandsverlening Belastingen), en corto LIBB y “Common Reporting Standard”, en corto CRS, tin e deber pa raporta datonan di nan clientenan na autoridadnan fiscal di Aruba y di otro paisnan cu ta cay bou e tratado internacional di intercambio di informacion.

            Incumplimento lo nifica cu Inspector di impuesto lo impone boetnan di acuerdo cu e Maneho di Boet relaciona cu intercambio di informacion financiero obligatorio (Boetebeleid bij Informatieplicht). 

Maneho di Boet 

            Entrante 21 di maart 2025 e Maneho di Boet a drenta na vigor. E maneho aki ta inclui entre otro e procedura ora di impone boetnan, e criterionan cu ta uza pa stipula e suma di boet y ta informa e persona of instituto concerni di su derechonan pa haci obhecion y apelacion contra e boetnan imponi. 

Ki momento ta aplica e Maneho di Boet? 

            E Maneho di Boet menciona ta aplicabel na momento cu un persona of instituto cu ta cay bou LIBB (articulo 1) no ta cumpli cu e obligacionnan di e ley manera abstene di duna informacion of duna informacion incorecto of incompleto na autoridadnan fiscal.

            DIMP ta recomenda tur persona of instituto financiero cu ta cay bou LIBB pa consulta e Maneho di Boet pa cu intercambio di informacion obligatorio cual ta disponibel riba www.impuesto.aw. Alabes e departamento ta haci un apelacion pa cumpli cu e intercambio di informacion di acuerdo cu nos leynan y e tratadonan internacional pa asina evita e boetnan pa incumplimento.