Intento pa rescata un palo di kwihi cu a kentel dilanti Costa Linda

ORANJESTAD (AAN): Un palo grandi di kwihi cu semper tabata grandi asina na un forma mahestuoso entre e dos vianan pasando door di Eagle, net na altura di e entrada pa bay Costa Linda, a kentel den fin di siman.

   Personal di DOW a wordo notifica cu e Kwihi a cay, y a hasta blokea entrada pa tur vehiculo, y tambe parcialmente a blokea e pasahe di e Linear Park cu ta pasa net ey dilanti na altura di Lowrise Hotelnan.

   Esey a pone cu mesora un crew di DOW a bay eynan, pa asina corta e pida ramanan cu ya caba lo no tin hopi speranza pe.  Pero e resto di palo di Kwihi, a wordo lanta bek, y a wordo reforza cu algun horket cu ta bay yuda tene esaki den halto.

   Algun rato despues, e caminda a habri bek pa auto y hende por a sigui pasa.