Inicio di estudio exploratorio riba desaparicion di piscadornan pa fortalece siguridad na lama

Gobierno di Aruba ta apunta ‘Onderzoeksraad voor Veiligheid’ 

ORANJESTAD (AAN): Gobierno di Aruba a tuma iniciativa pa cuminsa estudio exploratorio riba e desaparicion di piscadornan na lama, como parti di su plan pa fortalece prevencion y capacidad di respuesta den caso di emergencia riba lama. E estudio ta conduci pa e Conseho Investigativo pa Siguridad (Onderzoeksraad voor Veiligheid), riba peticion oficial di Gobierno.

E iniciativa aki ta forma parti di un esfuerso mas amplio di Gobierno pa identifica riesgo potencial y preveni situacionnan similar den futuro, mientras cu tambe ta fortalece mecanismo di rescate si acaso un incidente asina tuma luga.

Den e marco aki, Prome Minister Mike Eman, hunto cu Minister di Turismo, Transporte y Labor Wendrick Cicilia, a impulsa e proceso despues di encuentro, hunto cu Secretario General Robert Candelaria na fin di luna di september, na Hulanda.

Relacionado cu e enfoke riba siguridad na lama, Minister Cicilia a enfatisa tambe iniciativanan preventivo manera implementacion di FAD (Fishing Aggregating Devices). “Den fin di siman e di dos FAD a bay den lama,” segun e minister. E structuranan aki ta instala pa atrae pisca, permitiendo piscadonan pisca mas cerca di costa y dentro di awanan teritorial di Aruba. Esaki ta reduci necesidad pa bay distancianan leu of drenta awanan stranhero, cu consecuentemente ta disminui riesgo y contribui na practicanan di piscamento mas sigur.

E Conseho Investigativo lo evalua si ta posibel pa conduci un investigacion mas amplio riba riesgo structural di siguridad relaciona cu e desaparicionnan aki. Meta di un investigacion asina ta pa identifica patronnan, saca leccionnan y contribui na mehoracion di siguridad pa futuro.

Durante e fase exploratorio, lo sostene dialogo cu diferente organisacion y persona relevante na Aruba, incluyendo representante di sector di pesca y instancia cu ta participa den operacionnan di buskeda y rescate. Den e proceso aki, lo tin atencion special pa e impacto profundo cu e desaparicionnan tin riba famianan y comunidad.

Segun presidente di e conseho investigativo, Chris van Dam:
“Nos kier comprende bon kico a pasa, ki informacion ta disponibel y cual pregunta di siguridad ta mas relevante. P’esey nos ta cuminsa cu un estudio exploratorio como un factfinding mission. Basa riba e resultado, nos lo evalua si y con ta posibel pa sigui cu un investigacion mas amplio. Meta di e conseho investigativo ta pa siña. Asina nos kier contribui na mehora siguridad. Nos no ta investiga pa señala culpabel.”

Cu e inicio di e estudio aki, lo aplica e facultadnan di investigacion manera estableci den e ley di Reino pa e conseho investigativo, permitiendo conduci investigacion independiente dentro di Reino Hulandes.

Despues di finalisa e fase exploratorio, e conseho investigativo lo comunica e conclusionnan y si lo sigui cu un investigacion mas amplio.