Implementacion di ZIP Code na Aruba, un proyecto cu ainda ta wardando aprobacion

A pesar di e esfuersonan di CBS, Censo, y Postkantoor..

*Falta di prioridad of falta di comprension di importancia di un sistema postal modernisa? 

ORANJESTAD (AAN): Na Aruba, e idea di introduci un sistema di ZIP Code ta algo cu a haya atencion den fin di siman ora cu riba social media tabatin hopi hende cu tabata puntra riba esaki y por a mira hopi contesta ekiboca of hopi cerca di e realidad, pero cu na final a laga hopi duda riba pakico na Aruba ta uza 00000 como ZIP code, mientras cu otronan a confundi ZIP code cu Area Code (297).

            A pesar di e esfuerso pa implementa un sistema cu por facilita e entrega di carta y paketenan, e proyecto ainda no a haya e aprobacion necesario. Pero kico ta e balor di un ZIP Code, y con e por beneficia nos comunidad? 

Kico ta un ZIP Code?

            Un ZIP Code (of codigo postal) ta un manera di clasifica y organisa direccionnan geografico. Na hopi pais, e sistema aki ta yuda postkantoor y trahadornan pa haci entrega di carta y paketenan di un manera mas rapido y eficiente. Cada codigo ta representa un distrito, un bario, y un caya especifico. E prome dos of tres cifra ta indica e area general, y e ultimo cifranan ta referi na e caya of region mas especifico. 

Un ehempel exitoso: E Caso di Merca

            Na Merca, e sistema di ZIP Code a wordo introduci na 1963 pa trata cu un aumento masivo den corespondencia. Su estructura basico tin cinco cifra, unda e prome cifra ta referi na un region geografico amplio, e siguiente dos na un distrito postal dentro di esaki, y e ultimo dos cifranan na un oficina postal especifico of area mas chikito.

            Ademas, na 1983 a wordo agrega un extension di cuater cifra ("ZIP+4") pa identifica locacionnan mas detaya, manera un departamento den un edificio of un "PO Box" specifico.

            E resultado? Un sistema eficiente cu por maneha miyones di carta y paketenan tur dia, asegurando entrega rapido y precis. Na Merca, un carta ta yega na su destino den cuestion di un par di dia or menos, danki na e uzo sistematico di ZIP Code. Esaki ta demostra con un sistema postal bon implementa por eleva e nivel di servicio pa un comunidad, cu por ta un inspiracion aki na Aruba. 

Esfuersonan pa introduci un sistema postal moderno

            Na Aruba, CBS (Centraal Bureau voor Statistieken) a tuma e liderazgo pa desaroya un sistema di codigonan conoci como "Geografische Adressen Classificatiecode" (GAC). Den esaki, tur districto, bario, y caya a ricibi su propio codigo, y dada tanto aña un rapport nobo ta wordo publica.

            Pa un trahador di Postkantoor, un ZIP Code lo permiti organisa e corespondencia den categorianan precis: di districto, pa bario, y despues pa caya. Esaki lo acelera e proceso di sorteo y entrega, reduciendo retrasonan cu actualmente ta hiba un luna of mas. 

E obstaculo: Falta di aprobacion

            A pesar di e esfuersonan di CBS, Censo, y Postkantoor, durante paso di tempo, e gobiernonan di Aruba ainda no a duna luz berde pa implementa e sistema. Esaki ta un decepcion pa hopi, pasobra e beneficionan ta hopi cla. Tin mencion cu por ta falta di prioridad of hasta falta di comprension di importancia di un sistema postal modernisa.

            Tin personanan cu ta opina cu na Aruba "nos ta mucho terco of ignorante pa implement'e, un trabou cu ta wordo haci pa añanan caba, cu por facilita Postkantoor su trabou mas miho".

            Ademas, a wordo indica, e publicacionnan actual di CBS tin algun discrepancia cu mester drecha of agrega na e version mas nobo, y esey ta algo cu por ta contribuyendo na e atraso.

Un apelacion pa avansa

            E implementacion di un sistema di ZIP Code na Aruba no solamente ta un tema di progreso tecnologico, pero tambe un paso pa yuda  comunidad den su necesidadnan diario. Tin un speransa cu un dia e esfuersonan cu a wordo haci pa añanan lo wordo finalmente implementa.

            Na final, e implementacion di un ZIP Code lo ta un paso chikito, pero cu un impacto grandisimo pa e maneho di corespondencia y comunicacion na e isla.

            Ta spera cu e Gobierno nobo cu ta bay sinta lo por atende e importancia di esaki y tuma e pasonan necesario pa implementa e sistema di manera oficial.

            DIARIO lo sigui trece mas informacion.