Iberostar Hotel na Eagle Beach lo habri su portanan dia 1 December 2024

Prome Minister Evelyn Wever-Croes:

ORANJESTAD (AAN): Dialuna 11 di november Prome Minister Evelyn Wever-Croes hunto cu colega Minister Dangui Oduber a bishita Iberostar Hotel na Eagle Beach pa asina mira e avancenan di e construccion di e hotel. Iberostar ta un hotel di 5 strea cu na final lo consisti di un total di 240 camber. E hotel ta proyecta di habri su portanan dia 1 di december venidero, cu un total di 140 camber disponibel pa nos bishitantenan. 

            Prome Minister ta indica cu durante su bishita e por a mira con bunita e hotel ta kedando. E hotel ta uno espacioso y por mira e inversion den esaki unda ta resalta e acabadonan hopi detaya y precioso. E mandatario principal a expresa cu loke a impresion’e mas ta e echo cu mayoria di e trahadonan di Iberostar Hotel ta ciudadanonan local, yiunan di tera, y cu apesar cu e hotel no ta den funcion, ya ta laborando na e hotel.

            Tambe e mandatario a keda sumamente complaci di wak hobennan recien gradua di EPB School y Colegio EPI laborando na Iberostar. Otro echo remarcabel ta cu e hotel a manda varios di e trahadonan den exterior entre otro pa Mexico, Jamaica y Republica Dominicana pa tuma training segun e standard di Iberostar Hotel.

            “Nos ta aprecia e inversion den pais Aruba y principalmente cu nan ta dunando oportunidad laboral na nos yiunan di tera, esey ta un echo cu nos ta balora. Pabien y exito na e empleadonan cu ya caba ta laborando na e hotel. Cu esaki por bira otro proyecto exitoso pa Aruba”, Prome Minister a expresa.