Husticia a declara liber e ex-miembro di CEA condena pa posesion di arma

Corte Superior tin duda den declaracion di testigonan

ORANJESTAD (AAN): Diaranson merdia via video conferencia, Hof di Corte Superior a dicta sentencia den e apelacion di e homber F.v.d.B., contra su condena pa complice di posesion di arma di candela. Apesar cu Procurador General (PG) a haya F.v.d.B. culpabel y a exigi 18 luna di prizon di cual 12 luna ta condicional, Hof a bisa cu tin duda den declaracion di e 2 testigonan y ta declara F.v.d.B. liber.

Luna pasa tratamento di e caso a tuma lugar caminda F.v.d.B. a bisa Hof cu e no ta di acuerdo cu e condena di 20 luna di prizon di cual 12 luna ta condicional cu 2 aña di prueba. El a bisa cu e no tabatin arma y cu tur e asunto aki ta un set up contra dje.

   Pistol caliber .32: Hof a mustra cu dia 7 November 2020, Polis a bay na un bar na Ponton caminda tabatin discusion entre dos hende homber. Polis a yega y a detene e homber P. cu tabatin un arma den un tas. Ta trata aki di un pistool Caliber .32.

1. a bisa e agentenan di Polis cu ta F.v.d.B. a bis’e tene e arma p’e. Polis a detene vd B. tambe. Hof a bisa cu e homber P. tambe a wordo condena pa posesion di arma di candela.

   Acusado ta cuestiona ‘set-up’: Hof a puntra vd B., pakico el a apela cu e sentencia. Segun vd B., e ta convenci cu dos homber cu ta amigo di otro, a set up contra di dje. El a bisa cu P. y e homber L. a duna declaracion contra dje. F. vd B. a bisa Hof cu e no conoce L. Hof a mustra cu ta ora cu a detene P., el a bisa di biaha cu e arma ta di vd B.

   Segun vd B., e no sa cana cu arma y tampoco tas. El a bisa cu e ta cana cu cartera. Hof a puntra pakico vd B. ta pensa cu P. y L. a palabra pa bisa cu e arma ta di dje. Segun vd B., Polis no tin prueba cu el a duna e arma na nan. Hof a bisa cu e dos hombernan ta hopi mas jong cu vd B. Segun vd B., e tabata 23 aña trahando cu CEA y a wordo kita door di e caso aki.

   Hof a mustra cu Polis a haya e cellular di vd B. den e tas di P. Segun vd B. e discusion tabata pafor di e bar y el a laga su cellular riba mesa den e bar. E ta kere cu nan a coy su smartphone for di ariba mesa.

   PG a exigi castigo: PG a bisa Hof cu vd B. ta bisa cu e hombernan P. y L. a gaña riba dje cu e arma ta di dje. Polis a haya e arma den e tas di P. y un cellular. E cellular ta di vd B. P. a wordo condena na 22 luna di prison di cual 10 luna ta condicional. Na opinion di PG, P. na momento di detencion a bisa cu e arma ta di vd B. y L. tambe a confirma esey.

   PG a bisa cu P. ta traha cu vd B. y PG ta haya dificil cu P. ta bay gaña riba vd B. PG a bisa cu e no ta kere declaracion di vd B. cu ta e hombernan a coy su cellular. PG ta kere cu e tas ta di vd B. PG a mustra cu como miembro di CEA, vd B. tabatin un arma ilegal. E ta haya cu no tabatin motibo pa a apela e sentencia. El a exigi pa Hof condena vd B. na 18 luna di prison di cual 12 luna ta condicional cu 2 aña di prueba.

   Abogado: Abogado mr. Steward a bisa Hof cu no tin prueba cu vd B. tabatin un arma di candela. Na opinion di mr. Steward, no por kere declaracion di P. y L. y ta haya cu no tin prueba di sosten. E abogado ta haya cu e dos hombernan P. y L., a tira e responsabilidad riba vd B. El a sigui bisa cu e declaracion di P. y L. ta contradictorio.

   E abogado a mustra cu e homber L. a wordo declara liber siendo cu e tabata hunto cu P. El a bisa cu no a haya finger print di vd B. riba e arma. E abogado ta haya cu no tin indicacion cu e arma ta di vd B. El a mustra cu a haya e arma serca P. E abogado ta haya cu Hof mester declara vd B. liber. E abogado a bisa Hof cu vd B. tabata traha cu CEA y door di e caso aki, el a wordo kita. E abogado ta lamenta cu e caso a tarda asina hopi pa wordo trata caminda a laga vd B. den incertidumbre.

   Hof a declara acusado liber: Corte Superior a declara F.v.d.B. liber di e acusacion, complice posecion di arma. Hof ta duda den declaracion di e dos testigonan P. y L. Na opinion di Hof, no tin indicacion cu tur cos a pasa manera P. y L. a declara na Polis. Hof ta pensa cu por ta tambe cu P. y L. kier a tira culpa riba F. vd B.

   Hof a mustra cu den e tas di P. a haya e pistol y e smartphone di F.v.d.B. Hof a bisa cu for di imagennan di video di seguridad den e bar, por mira cu P. a bay den bar y a coy algo for di un mesa. Hof a bisa cu no ta mucho cla kico P. a coy y P. durante interogacion na Hues Comisario, a bisa cu el a lubida kico el a coy for ariba e mesa.

   Esey ta trece cu ne cu Hof tin duda den declaracion di P. y L. y ta declara F.v.d.B. liber.