Hurista di Departamento di Aviacion Civil ta ricibi su diploma di postgrado

ORANJESTAD (AAN): Recientemente señora Marjanne Jarzagaray-da Silva, juridisch beleidsmedewerker na Departmemento di Aviacion Civil (DAC),

a gradua y a ricibi su diploma di postgrado den derecho aeronautico. Esaki a tuma lugar den presencia di Minister responsabel pa transporte, sr. Ursell Arends, y director di DAC, sr. ing. Edwin Kelly.

   Señora Marjanne Jarzagaray-da Silva a completa su estudio di derecho na 2012, na Universidad di Aruba, cu e profiel di privaatrecht. E mes un aña señora Jarzagaray-da Silva a cuminsa su carera profesional na DAC como hurista. Durante e añanan cu a pasa señora Jarzagaray-da Silva a logra completa diferente cursonan pa specialisa su mes den e ramo di aviacion.

   Na aña 2022 señora Jarazagaray-da Silva a inicia su estudio di postgrado na Universidad Católica Argentina (UCA) den e ramo di Derecho Aeronautico. E estudio aki a tuma luga danki na un beca otorga na Aruba door di Comision Latinoamericana di Aviacion Civil (CLAC). Aruba ta pais miembro di CLAC pa hopi aña caba y un di e bentahanan grandi di e miembrecia aki ta e posibilidad pa obtene beca pa estudionan specialisa den ramo di aviacion.

   Na december 2024 Señora Jarazagaray-da Silva a termina e estudio aki exitosamente cu un score di 9. Topico di su tesina (thesis) ta “Incidentes de pasajeros rebeldes en la aviacion: una exploración integral de causas, impactos y estrategias de mitigación” (na ingles: “Unruly passengers”). Copia di e thesis aki tambe a worde entrega na Minister Arends.

   Minister Arends, y director di DAC a felicita Señora Jarazagaray-da Silva cu e logro importante aki. Tambe un palabra di gradicimento ta bay pa CLAC cu a otorga e beca pa Señora Jarazagaray-da Silva por a haci e estudio importante aki.

   Awor Departamento di Aviacion Civil, y Aruba como pais, ta conta cu un hurista mas specialisa academicamente den derecho aereonautico, cu sigur ta un contribucion grandi pa Aruba su aviacion.