Hues a libera homber acusa di a haci actonan inmoral cu yiu muhe di su pareha

Caso den Corte

ORANJESTAD (AAN): Riba Diahuebs mainta, Hues a dclara e homber Colombiano di inicial P. di 44 aña residencia na Aruba, liber di e acusacion di a mishi y masturba riba e yiu muhe di su pareha riba 6 Februari 2025.

   Luna pasa tratamento di e caso a tuma lugar caminda Fiscal ta haya P. culpabel y a exigi 180 dia di prizon di cual 75 dia ta condicional cu 2 aña di prueba.

   Durante tratamento di e caso, Hues a bisa cu e yiu muhe A. a yama Polis y amigonan, bisa cu P. a mishi cun’e na su parti intimo y cu P. a masturba banda di dje. El a haya ataque di panico. Segun P., A. ta sufri di problema psycologico. El a bisa cu den pasado A. a wordo viola. Door di problema mental, A. lo ta kere cu P. lo bay abusa di dje. P. a bisa cu dia 6 Febuari 2025, e tabata na e cas hunto cu su yiu di 5 aña den camber y A. tabata drumi den sofa. El a bisa cu normal, ora e mama bay traha, A. ta sali y no ta keda den cas cun’e.

   Sinembargo e dia ey A. a keda den cas. P. ta conclui cu aki ta mira cu A. a planea algo pa perhudik’e. El a bisa cu e no sa si e ataque di panico tabata un set up of no. El a bisa Hues cu A. sa haya e ataque di panico regular. El a bisa cu e tabata drumi y ora el a tende hende bati na porta, el a bay habri e porta y tabata Polis.

   Segun P., hopi biaha A. ta acus’e di a abusa di dje. El a bisa cu hopi biaha A. ta set up problema entre e. y e mama. A. ta yama Polis y ora Polis yega e ta bisa nan cu P. kier a abusa di dje. Ora Polis puntr’e, e ora ey ta bisa cu P. no a haci nada.

   Fiscal a exigi castigo: Fiscal ta haya P. culpabel di a mishi cu e mucha A. Fiscal ta considera esaki, actonan inmoral caminda a tacha e integridad di A. Fiscal a bisa cu esaki por causa cu A. lo por keda afecta pa hopi tempo.

   Pa cu e castigo, Fiscal a bisa cu e ta tene cuenta cu e tempo cu P. tabata sera relaciona cu e caso. E tabata 105 dia sera. Fsical a exigi 180 dia di prizon, di cual 75 dia ta condicional cu un tempo di prueba 2 aña.

   Sentencia: Riba Diahuebs mainta, Hues a bisa cu e ta haya cu no a keda legalmente proba cu P. ta culpabel y ta declar’e liber.

     Hues a bisa cu miembro di Team Forensico a tuma muestra di liquido riba deken caminda segun A., P. a masturba. A manda esaki Hulanda caminda Instituto Forense di Hulanda (NFI) a haci investigacion y no a haya nada di sperma.

   Door cu no tin prueba, Hues no ta convenci cu P. a mishi y haci actonan inmoral cu A. Hues a declara P. liber. Por a mira cu e mama di P. y su pareha a keda contento cu e decision di Hues