Hues a declara dos homber liber di posecion di arma di candela den auto

Team di Aresto a actua pero no a produci suficiente prueba

ORANJESTAD (AAN): Recien tabatin un sentencia interesante den Corte di Husticia di un caso penal contra e hombernan J.B. y T.W. Ta asina cu J.B. so ta deteni.

   J.B. a worde acusa cu riba 15 December 2025, e tabata den posecion di arma, a mustra arma y menaza hende cu e arma. T.W. y J.B. a wordo acusa cu riba 21 December 2025 e tabata den posecion di arma y tambe posecion di marihuana.

NO PROBA MENAZA CU ARMA

Hues a cuminsa cu J.B. y a mustra cu e no ta haya proba cu J.B. tabata den posecion di arma y menaza cu esaki. Hues si ta haya cu J.B. a menaza 2 persona esta e hombernan W. y G. Hues a mustra cu ta solamente W. a bisa Polis cu el a mira J.B. cu un arma. G. a bisa Polis cu e no a mira arma.

   Hues a remarca cu un arma cu lo ta sali for di e carson manera W. tra bisa, lo mester tabata visible pa G. Hues a bisa cu W. tabata papia di un revolver. W. lo a bisa cu otronan cu J.B. tin un revolver. Hues a conclui cu e no ta haya declaracion di W. confiabel. No por confirma cu J.B. tin revolver. Hues a declara J.B. liber di menaza cu arma. Hues a sigui bisa cu e ta haya J.B. culpabel di a menaza W. y G.

NO PROBA POSECION DI ARMA DEN AUTO

Hues a mustra cu dia 21 December 2025, Team di Aresto a para J.B. y T.W. cu tabata den un auto. Miembronan di Team di Aresto a mira un arma den e compartimento mey mey den e auto. A resulta cu e arma tabata un revolver cu bala.

   Hues a mustra cu e dia ey, J.B., un rato promer cu el a wordo deteni pa e Team di Aresto, el a subi e auto y tabata core e auto. E revolver tabata den mey mey den e auto y tabata lora den paña. T.W. tabata core e auto promer y despues J.B. a bay stuur. Tanto J.B. y T.W. ta desmenti di sa algo di e arma. E droga tabata di J.B.

   Hues no ta haya proba cu J.B. y T.W. tabata conciente di e arma di candela. Hues a remarca cu Polis no a haci investigacion pa saca afor kende realmente ta doño di e arma. Hues a declara tanto J.B. como T.W. liber di e acusacion di posecion di arma di candela den auto.

Hues ta haya solamente cu J.B. a menaza W. y G. cu morto y 21 December 2025, e tabata den posecion di marihuana.

Pa cu e castigo, Hues a bisa cu e menaza cu morto ta tacha e hendenan nan sentimento di seguridad. Tambe e posecion di marihuana ta castigabel. Hues a bisa cu e ta tene cuenta cu anterior J.B. a wordo condena pa posecion di arma y droga. Hues a condena J.B. na 4 luna di prison. E arma lo mester wordo destrui. Pa loke ta T.W., Hues a declar’e liber.