Horacio Oduber Hospital a celebra apertura ceremonial di su entrada principal

ORANJESTAD (AAN): Despues di añanan di construccion y renovacion, Horacio Oduber Hospital a celebra apertura ceremonial di su entrada principal, marcando un paso importante pa e Hospital di Aruba.

E ceremonia a reuni directornan di HOH, partnernan encarga cu expansion y renovacion di e facilidad, SOGA y AIB. Minister di Salud Mervin Wyatt-Ras y Prome Minister Mike Eman, cu a hiba palabra durante e acto ceremonial, como tambe a corta sinta como simbolo di culminacion di e fase aki.

E proyecto di modernisacion di HOH tin su origen den e vision di inversion den salud cu a cuminsa durante gabinete anterior bou liderazgo di Prome Minister Eman.

Prome Minister Eman a resalta e significado di e momento, describiendo e proyecto como resultado di un trayecto largo cu hopi reto, pero tambe cu perseverancia, colaboracion y compromiso di tur esnan involucra.

Den su discurso, Prome Minister Mike Eman a haci mencion special di e ministernan cu a hunga un rol clave den inicio di e proceso, reconociendo e continuidad di vision y esfuerso a lo largo di diferente gabinete. El a expresa su gratitud na ex-Minister Richard Visser y ex-Minister Alex Schwengle pa nan contribucion significativo na desaroyo y impulso inicial di e proyecto, como tambe ex-Minister Oduber pa e continuidad di e proyecto.

Segun e Prome Minister, e logro aki ta refleha cu progreso nacional ta resultado di colaboracion y continuidad di politica publico, unda cada fase di liderazgo a aporta na e meta comun pa fortalece e sistema di salud di Aruba.

Prome Minister Mike Eman a dedica tambe palabra di reconocemento na e profesionalnan medico cu a laga nan fingerprint den desaroyo di cuido di salud na Aruba. Den esaki, el a menciona cu orguyo dr. Horacio Oduber, kende su nomber ta carga pa e hospital como un tributo na su legado y na su contribucion extraordinario na sector di salud.

Tambe el a pone enfasis riba e aporte di otro dokternan y profesionalnan medico cu, a lo largo di e añanan, a duna nan conocimiento, sacrificio y compromiso pa fortalece e fundacion di cuido medico na Aruba, entre nan dokter Haage, dokter Saladin, dokter Ho Kang You, dokter Falconi. Cu e mencion aki, e Prome Minister a destaca cu e progreso cu awe Aruba ta celebra den Hospital Horacio Oduber ta para riba e trabao y dedicacion di diferente generacion di medico y lider den salud.

   “E proyecto aki a pidi sacrificio, dedicacion y cooperacion di hopi parti. Awe nos por celebra cu orguyo cu nos a logra un paso importante pa cuido medico na Aruba,” Eman a expresa.

   El a subraya e rol crucial di partnernan manera SOGA, AIB y esnan involucra den construccion y desaroyo di e hospital, reconociendo e esfuerso continuo pa logra e resultado final.

Den su discurso, el a pone enfasis riba e importancia di cuido medico di calidad pa comunidad, indicando cu inversion den salud ta un prioridad pa gobierno y un pilar esencial pa bienestar di pueblo.

Tambe el a expresa su gratitud personal na tur profesional y colaboradornan cu a contribui den e proceso, resaltando cu e logro aki ta resultado di trabao conhunto y dedicacion constante.

E entrada principal nobo no solamente mehora e acceso y funcionalidad di e hospital, pero tambe representa un simbolo di progreso den e sistema di salud di Aruba.

   E ceremonia a tuma luga den un ambiente ameno di gratitud, marcando un etapa importante den e desaroyo continuo di Horacio Oduber Hospital y den compromiso di Aruba pa sigui inverti den salud pa su pueblo.