Hopi hende preocupa pa aumento di pobreza na Aruba

ORANJESTAD (AAN): Den ultimo simannan por a nota den red social cu hopi hende ta preocupa cu aumento di pobreza na Aruba.

Segun e rapport ‘Financial Wellbeing of Households’ di Banco Central di Aruba, relaciona cu situacion socio-economico, mas cu 60 porciento di famianan den comunidad a wordo afecta pa perdida di entrada. Mas di 30 porciento a indica cu nan tin demasiado debe y 1 den cada 3 hogar tin dificultad pa paga pa cuminda.

Esaki ta situacionnan critico y ta causa hopi stress den famianan.

Banco Central tambe a agrega cu esaki sigur ta afecta e poder di compra di casa cas. Segun algun comentario riba red social, "prome cu e pandemia cos tabata preta, awo a bira pio!". Otro comentario a indica cu loke nan por a cumpra cu 100 florin, awo ta casi nada. Y mayoria di keho ta "tur cos ta caro".
E investigacion di Banco Central di Aruba tabata pa solamente midi e posicion financiero di hogar basa riba nan entrada y gastonan, sino tambe e impacto di e COVID-19 pandemia riba e percepcion y sentimiento di bienestar financiero di famia.

Mester enfatiza cu famianan a adapta y purba di spaar na unda nan por. Gasta menos na come afo, haci mas actividad na cas cu e muchanan y spaar awa y coriente mas tanto cu ta posible. E  realidad ta cu preocupacion riba finanzas den un famia of persona ta keda un stress, cu tin biaha ta dificil di resolve sin un ayudo profesional of di instancianan concerni.