Razzia riba Diabierna atardi den centro di ciudad
ORANJESTAD (AAN): A base di investigacion, posibelmente incluyendo tip balioso cu ta drenta na autoridad, na fin di siman pasa autoridadnan hudicial a sinti cu nan tin suficiente indicacion cu algo incorecto ta andando den un caya hopi cerca di centro di ciudad.
Despues di a haya luz berde di Ministerio Publico, a dicidi pa drenta mesora den accion. Pesey riba Diabierna atardi mes, Unit Narcotica di Cuerpo Policial Arubano a tene un razzia hunto cu demas autoridad.
Nan a bay tene e razzia aki na un propiedad ey na Hendrikstraat na Oranjestad. E caso aki ta centraliza rond di e investigacion riba bendemento di droga na gran escala.
E yegada di autoridadnan na e lugar tabata sorprendente pa esnan cu tabata na e adres, y no a keda nada otro sino duna nan ordo pa hisa man den halto y no move. Asina e oficialnan hudicial a detene un homber naci na Aruba, y un muhe naci na Republica Dominicana.
Vocero di Polis a confirma na DIARIO cu durante e razia nan a bin topa cu basta droga na e adres aki, unda e dos personanan aki tin nan warda. A coba den tur skina, y tur droga a wordo confisca. Lamentabelmente vocero di polis no a informa ta cuanto e peso di e droga ta, pero si a agrega cu ta trata aki di Cocaina y tambe Base di Cocaina.
Unit Narcotica awor ta sigui cu e interogacion di e dos personanan captura, y autoridad a confirma cu no ta descarta cu lo tin mas detencion den e dianan venidero relaciona cu e caso aki.
Manera semper, Cuerpo Policial ta duna hopi balor na tipnan cu comunidad ta duna. Y pa bo yuda ta hopi facil. Si bo sa algo, of a mira algo, bo por yama awor nan Tipline di Polis cu ta 111-41. Corda cu nan ta garantiza cu bo ta keda anonimo.
