Homber cu maltrato brutal riba su mama na Shiribana

El a dal’e cu piedra grandi den cara

ORANJESTAD (AAN): Dialuna den oranan di atardi, un unidad di Polis a ser manda na un adres conoci pa autoridadnan na Shiribana na Paradera.  E informe a drenta cu un conocido di husticia, a caba di maltrata su mesun mama.

   Pa Polis, esaki no ta prome biaha cu patruya ta bay na e mesun adres aki, pa atende e homber problematico aki.  Autoridad sa cu unda cu e acudi, ta problema y dolor di cabes so e ta ocasiona.

   E atardi aki, a bin haya sa cu e homber a uza un obheto duro pa dal su mama.  Despues a haya informacion cu ta un piedra grandi el a gara den su man, y el a bay dal esaki na forma brutal den cara di e mama inocente.

   Polis a pidi pa presencia di Ambulance, pasobra e golpi fuerte aki cu e piedra grandi posibelmente a ocasiona un fractura na e cachete di e mama.

   Ora cu Polis a yega, ya e homber cobarde aki a core huy di e cas.  Pues e ta fuerte, pero no kier para responsabel pa su actonan.  Sinembargo Polisnan sa bon ken e ta, y unda kizas nan por gar’e.  Su number lo hunga un di e dianan aki.