Hobennan mucha homber, Arubiano y stranhero entre 17 te cu 25 aña por inscribi pa e siguiente trayecto di Formacion Social

Jessy Ras di Formacion Social (SVT):

ORANJESTAD (AAN): Formacion Social (SVT -Sociaal Vormings Traject) ya pa 15 aña ta duna hobennan un di dos oportunidad pa logra exito. Formacion Social ta un programa structura pa transformacion di hubentud, dedica na guia hobennan entre 17 te 25 aña pa un miho futuro. E programa ta diseña pa hobennan cu ta na un crusada di bida, sea nan a stop di bay di school, nan ta sin trabao of nan ta buscando direccion den bida, pa desaroya disciplina, confianza y responsabilidad. Alaves, e programa ta yuda e hobennan crea caminda pa drenta e mercado laboral of continua cu nan estudio.

   Señora Jessy Ras di SVT, den un entrevista cu DIARIO a duna di conoce cu inscripcion pa e siguiente trayecto di SVT ta habri y ta invita hobennan mucha homber cu ta identifica nan mes cu e structura y beneficionan di e programa aki, pa inscribi pa asina pasa den e proceso di seleccion pa asina e siguiente trayecto cuminsa dia 17 di augustus proximo.

   El a agrega cu no tin un trayecto pa hoben mucha muhe actualmente pa motibo cu no a haya suficiente mucha muhe cu a inscribi pa cuminsa cu un grupo. Pero pa otro aña ta proyecta pa cuminsa cu un trayecto sperando cu lo tin suficiente hoben femenino motiva pa haci e trayecto.

   Señora Ras a indica cu pa inscribi pa e trayecto, mester cumpli cu algun rekisito. E hoben mester ta entre 17 pa 25 aña y mester tin pasport Hulandes. Hobennan di otro nacionalidad mester tin tambe permiso valido y ta recomenda cu nan ta compronde Papiamento. Den e fase di seleccion, lo pasa den test medico, test di deporte, y tambe lo mester pasa den un seccion di combersacion cu trahadornan social.

   Oficina di SVT ta situa na Mariniers Kazerna na Savaneta. Por tuma contacto via telefoon 522-5352, WhatsApp 564-5339, email This email address is being protected from spambots. You need JavaScript enabled to view it. y Facebook.