Hoben menor di edad a dal y kibra auto di su tata

Dialuna marduga na Tanki Leendert

ORANJESTAD (AAN): Dialuna marduga banda di 2:00 am, un automobilista a topa un auto sedan Suzuki Baleno ful kibra coriendo riba e caminda di Playa pa Tanki Leendert, yegando rotonde di Tanki Leendert.

   Mesora un luz ta cende indicando cu algo no ta cuadra akinan, pasobra e automobilista a ripara cu e taira banda drechi parti patras a sufri daño y e auto no tabata stabil riba caminda y tabata bay constantemente riba su banda robes.  E movimento inusual aki tabata trece peliger grandi pa trafico contrario.

   A sigui core bay nort, y na altura di Parke Arawa na Moko, e auto a baha caminda y por a mira esnan den auto a baha, posiblemente a cambia di chauffeur. Tabata trata di un dama.

   E auto sabiendo cu e ta un peliger grandi riba caminda, a bolbe subi caminda y yegando bocht di Calbas e auto a slow down, unda un dama hoben a baha y cuminsa duna e auto su tras señal pa para esaki no a wordo haci.

   E Suzuki Baleno a sigui direccion Kudawecha y despues pa Sabana Liber. Poco pabou di birada na Sabana Liber polis a intercepta e auto.

   E auto a baha caminda y e porta a habri, unda un menor di edad den paña parecido na paña di drumi a baha y a hisa ambos man pa polis.

   Parse cu e hoben tin apenas 15 aña di edad, pues no tin rijbewijs.  E auto ta di su tata. Mientrastanto e dama a keda altura di Calbas, unda e tabata bati na porta di hende. Polis a logra hay'e y a detene tambe.

   Ambos a wordo deteni y hiba Warda di Shaba.

   A bay check e ruta cu el a core, y pariba di e rotonde di Tanki Leendert, autoridad a topa cu un rastro di azeta di auto y drenta e caya panort por a mira cu e auto lo a dal contra un palo di luz. Parti di e auto tabata benta eynan.

   A nota cu e auto a sufri daño grandi tur rond.  Chens ta grandi cu aseguro no ta paga nada den casonan asina.