Hit & Run cruel a cobra bida di pareha cu a caba di sali di Casino

Prome dos morto di Trafico pa 2026

• Chauffeur femenino cu a huy a keda deteni un rato despues
• Jeep Grand Cherokee haya cu destruccion extenso 

ORANJESTAD (AAN): Un pareha hopi feliz riba Diadomingo anochi, a caba di pasa anochi dibertido na Wind Creek Crystal Casino, y a baha trapi pa asina nan cruza e caya y regresa nan auto pa bay cas.

   Nan a sali via e salida di Renaissance Mall, y ey nan a bay cruza e caya.  Aki na e salida di Mall NO tin zebrapad (Pero 38 meter mas pabao net dilanti salida di e Casino si tin zebrapad).  Nan a bay cruza e caya aki net unda cu e ‘brug di Renaissance’ ta bahando y net eynan no tin zebrapad.  Aki un vehiculo tipo SUV color preto a baha cu velocidad halto di pariba.  E peatonnan cruzando e pida caya ey sin zebrapad no por a haci mucho mas, y ambos a wordo impacta fuertemente door di e vehiculo.

   Debi na e impacto, e señora victima a wordo catapulta y cay 20 meter mas dilanti parti pazuid di e caminda, net dilanti Lucy’s Retired Surfers Bar & Restaurant. El a cay boca abao.

   Door di e impacto, e vehiculo su hood a los y kibra bay halto, y aki aparentemente e victima masculino a keda sea pega bao di e hood, of pega riba e windshield.  E victima a keda core pa como 75 meter benta riba e hood, te ora cu e vehiculo a yega dilanti ex-edificio di Aduana, y aki e victima masculino a sali cay y keda benta eybao.

   Central di Polis a ricibi e prome yamada pa 11:58 pm di hendenan raportando un accident grave cu a caba di socede riba Lloyd G. Smith Boulevard banda di Wind Creek Crystal Casino, y cu tin dos hende benta abao.

   Caso di Hit & Run: Mientras cu patruyanan di Playa a ser manda, y a drenta informacion cu ta un SUV color preto a dal nan, y a sigui core bay.  Centro di Alarma tambe a wordo notifica y a cuminza manda unidadnan di Ambulance.

   E prome unidad di Polis cu a yega, a bin nota cu e señora victima ta boca abao seriamente herida, y 61 meter mas pabao riba caminda banda panort tin e otro victima.  Nan a core pidi pa Ambulance yega cu maximo urgencia.

   E prome Ambulance cu a yega, mesora Paramediconan a baha pa bay duna asisentncia medico na tur dos victima pero lamentablemente no por a haci nada mas pa nan.  Nan a bin haya e victimanan den condicion severo, cu fractura complica, y uno di nan hasta ta parce cu e pia a kita di e curpa pero a keda wanta door di e paña cu e tin bisti.

   Nan a pidi Polis pa manda Docter pa eynan.  Central di Polis e ora a cuminza pone tur autoridad competente na altura, y a pone team forensico di BFTO, y tambe Docter Forensico pa yega eynan.  Tambe a pone Specialista di Trafico, y Bureau Slachtofferhulp pa yega eynan.

   No a cruza riba zebrapad: Polis a cera e caminda pa trafico, pero como cu e anochi ey tabatin hopi hende na pia canando den e area, a dicidi pa tapa e victimanan pasobra nan curpa a keda benta abao den forma inusual.

   Mientras tanto Polisnan a cuminza papia cu testigonan pa asina haya detaye di e vehiculo, y esaki a inclui check security video.  Por a mira Polis y BFTO ta tuma dato net dilanti e salida di Renaissance Mall (y no e salida cu zebrapad di Crystal Casino).  Nan tabata check e area unda hopi biaha hende ta cruza, pues e lugar unda NO tin zebrapad.  Si un vehiculo bin cu velocidad di pariba, peatonnan hopi biaha no ta haya tempo pa reacciona.  Den dia tabatin hopi informacion incorecto ta circula cu e pareha tabata riba Zebrapad, pero esaki aparentemente no tabata e caso.

   Esey ta e motibo pakico no a pone zebrapad asina cerca di e brug, ni banda pabao ni banda pariba (unda tin e cabay blauw).  Awendia banda pariba e zebrapad ta te dilanti oficina di Gobierno.  Esun mas pabao no ta existi mas pa hopi aña caba.

   Poco despues, Docter Voskuil a yega, y a constata morto di Carlos David Vialez Valerio, naci riba 19 di October 1971 (53 aña) na Republica Dominicana y residencia na Aruba.  Tambe a constata morto di su pareha, Jocely Paulina Vasquez Gonzalez naci riba 9 di Juli 1960 (64 aña) na Republica Dominicana y residencia na Aruba.

   Nan a bira Morto #1 y tambe Morto #2 di Trafico pa 2026.  Vocero di Polis Liliana Rasmijn, a splica cu esaki ta un caso hopi tristo y lamentable cu nos ta habri siman cu ne.

   “Nos ta keda pone enfasis esaki no ta manera!  Chauffeur tin di para y keda na e lugar di accident. E victimanan aki ta ser humano y nan tambe tin famia. Mester sigui reglanan di trafico pa un trafico sigur,” Rasmijn a splica.

   A bin haya e Jeep Grand Cherokee: Danki na loke testigonan a mira, y tambe grabacion High Definition di security video, a logra haya e plachi di number, y asina a haya sa e adres.

   Polis a bay den marduga mes na e adres riba e caminda di Bushiri pa Pos Abao, y na un compleho na Bushiri a bin haya e Jeep Grand Cherokee color preto aki staciona bunita asina mey-mey di varios auto mas.  E vehiculo Grand Cherokee tabatin daño significante na parti dilanti.  E bumper dilanti a kita, e grille ta daña, e capa di motor a machica comosifuera ta papel a wordo machica.  E hood no tabata cera mas, y pa colmo e windshield ta kibra.  E motor ainda tabata cayente.

   Con e chauffeur a sigui core den condicion cu windshield tur gescheur, y cu e hood den halto asina?  Su bista tabata full limita.  E ta demostra cu cueste loke cueste e chauffeur kier a huy di eynan y a haci esfuerzo sobrehumano pa keda core cu su vehiculo asina kibra pa huy pa su responsabilidad.

   Si acaso el a spanta mes, e lo a stop eynan pasobra coremento cu hood parcialmente habri, cu windshield cu bo no por mira door di dje mas, ta algo cu lo a spanta cualkier hende y stop mesora.

   Autoridad ta bay investiga pa haya sa unda e victima masculino a keda pega riba e auto pa e distancia di 61 meter ey, sea dilanti e windshield of ta bao di e hood riba e motor cayente.  Te dilanti edificio di ex-Aduana Aruba el a sali cay riba caminda.

   E chauffeur femenino a wordo haya na e adres, y el a keda aresta mesora.  E ta sigur di lo perde pa mira Carnaval 72 completo, y e hecho cu el a caba cu bida di 2 persona inocente coriendo duro riba e caminda ey, y hasta huy pa e caso a bira Hit & Run... lo bay cay duro riba dje ora e presenta dilanti Hues.

   Mientras tanto, team forensico di BFTO ta investigando e vehiculo, pa hunto cu tur detaye traha tur cos den un rapport extenso.

   Comunidad Dominicano riba Dialuna a mustra di ta den tristeza enorme, cu e pareha David y Jocely a wordo ranca cruelmente for di nan famia y amigonan.  A nota cu hasta Fundacion Dominicana Arubanse Juan Pablo Duarte a manda condolencia caba na tur famia, y tambe comunidad.

   DIARIO tambe hunto cu Cuerpo Policial Aruba ta manda palabra di condolencia na famia di e fayecidonan.