Hende ta plamando ‘fake news’ riba social media siendo cu e duo aki no ta di Aruba

Mesun noticia falso ta aparece na otro paisnan

ORANJESTAD (AAN): Tin algun persona cu ta djis mira algo riba social media, y sin pensa dos biaha ta core “share/comparti” esaki pa asina sigui plama cos falso rond.

   Di siman pasa caba dia 14 di Januari, a mira esaki ta wordo plama rond di Aruba, siendo cu bo por djis haci un checkup riba internet y bo ta descubri cu e mesun mensahe aki ta plamando rond, y cada biaha e nomber di pais ta cambia.  Esun plamando na Aruba cu ta bisabo watchout cu e dos hendenan aki, tin e hashtag di #aruba riba dje, siendo cu e caso mes ta full falso.

   Mas di e duo aki: E potret mes di e homber ta aparece cu e nomber Fred Crawford di 43 aña.  Sinembargo informacion cu DIARIO a obtene di siman pasa caba ta cu su nomber di berdad ta Douglas May Jr. y e ta encarcela na estado di Nebraska na Merca desde Juni 2024.

   E muher ta aparece cu e nomber Mariel Wayne di 36 aña.  Pero esey no ta berdad.  E tambe a wordo deteni cu droga na Nebraska y su nomber di berdad ta Kristen van Westen.

   Pues nan no tin nada di haber cu Aruba.  Nada.  Pero tin hende pa pret a pone nan potret hunto, crea storia falso, y ta publicando esaki riba diferente pagina di ‘Facebook marketplace’ y tambe riba Instagram, cu nan meta ta pa haya hopi ‘trafico’ di hende riba e paginanan ey.

   Polis di Aruba ta reacciona: Vocero Liliana Rasmijn di Cuerpo Policial di Aruba, a reacciona den fin di siman riba esaki.  El a bisa cu Cuerpo Policial Aruba a tuma nota di e post aki cu ta bayendo rond riba social media.

   Pa Cuerpo Policial e incidente aki no ta conoci. Tampoco e victima y of e sospechosonan riba e potret.

   E ta simplemente un ‘Noticia Falso’, of yama como ‘Fake News’.  Nan ta manda un mensahe di alerta pa no cay den e trampa di postnan falso manera esaki.  Tampoco share of duna bo informacionnan! Paga bon tino pa cu esakinan.

   DIARIO a compronde cu Facebook aparentemente a kita e post cu ‘Aruba’ menciona den dje.  Pero tene cuenta cu e por aparece otro lugar, pasobra Scammernan cueste loke cueste kier pa bo keda den contacto cu nan.