Hefe di Servicio Ambulance ta pidi cautela den trafico

Januari a cera cu 75 melding di accident:

ORANJESTAD (AAN:) Liberato Hoek, Hefe di Servicio di Ambulance ImSan, den entrevista cu Matutino DIARIO a reitera, cu e temporada aki ta uno hopi druk, cu hopi trafico, y unda tur hende kier yega lihe na nan destinacion.

   “Nos a cera Januari cu rond di 75 melding pa accidente, dus, cu ta basta den un luna. Nos tin un fin di siman mas pa bay, cu nos sa cu ta bay ta hopi druk. Nos ta pidi e personanan pa tuma prevencion necesario den trafico, bisti bo safety belt, si bo ta bay bebe no stuur, busca un amigo responsabel pa cu esaki, zorg pa bo muchanan ta na cas, purba maneha na un manera responsabel”, Liberato Hoek a subraya.

   El a reitera cu e sa cu tur hende kier yega lihe, pero sali laat yega trempan no ta bay. Pues ta hopi cauteloso den trafico, specialmente e ultimo fin di siman cu ta bay bin.

Aworaki ta dianan normal, pero ta conoci cu e dianan di parada tambe tin accidentenan cu no directamente ta relaciona cu e parada y tin di nan hasta ta despues di e parada y ta keda na cada ken pa ta responsabel riba nan manera di stuur den trafico.