Hazaña Kayak for Nature Curacao Aruba a finalisa exitosamente

Apesar di awacero y lama bruto -  *E team a yega Commandeursbaai sano y salvo

ORANJESTAD (AAN):  Manera a wordo anuncia, diasabra ultimo, un grupo di 5 persona a inicia nan hazaña di crusa den kayak di Corsow na Playa Kalki te na Commandeursbaai Aruba y caba na Serene by the Sea.

            Ta trata di Ryan de Jong di Corsou, Stepfanie “Nine” Ekert di Alemania, Angelo Kock di Aruba y Luis Wever di Aruba.

            E motibo principal cu nan ta bay haci esaki ta pa concientisa tur hende riba e necesidad pa protehe nos naturalesa y nos ecosistema y en particular Commandeursbaai.

            Tambe cu e cruse aki nan kier recauda fondo pa "Fundacion Proteccion y Conservacion di Commandeurs Baai" pa asina nan por sigui cu  nan trabaonan den e area di Commandeursbaai.

            Ora cu nan a yega Aruba nan a duna un declaracion cortico na prensa. DIARIO a logra combersa cu Angelo Kock y Ryan de Jong.

            Kock a laga sa cu esaki tabata un trayecto basta largo. Nan a sali 5:30 am for di Playa Kalki na Corsow. E salida mes tabata basta dificil caba ya cu awacero pisa a cay. Durante e viahe, tabata tin asistencia di un boto cu tabata yuda nan cu a visibilidad for di leu pa asina yuda nan yega na e destino final.

            E ruta mes, lama tabata basta bruto, cu basta ola y asina mes a logra yega exitosamente na Commandeursbaai na Savaneta, Aruba, alrededor di 8:15 pm. E duracion di e viahe tabata calcula entre 12 pa 14 ora. Pero a topa cu un lama basta bruto.

            Nan a sali como un team pa yega como un team. Nan a keda duna otro sosten pa asina henter e team por a yega sano y salvo na Aruba, Kock a expresa.