Tisa LaSorte: “Nos tur tin cu coopera cu polis”
ORANJESTAD (AAN) CEO di AHATA, señora Tisa LaSorte, den entrevista cu DIARIO a sigui elabora tocante e falta di personal na Cuerpo Policial di Aruba (KPA), specificamente agentenan policial.
LaSorte a indica cu loke ta dificil ta ora cu ta busca un solucion, y nan ta buscando un tipo di solucion pasobra ta conoci cu no tin suficiente polis den KPA.
“Pues, ami ta kere cu nos no ta soluciona e problema mes pero mester inverti mas den e polisnan mes, loke ta e problema cardinal”, Tisa LaSorte a reitera.
El a agrega cu tin problema social cu mester soluciona tambe, y tur habitante di nos barionan mester mira cual ta e muchanan cu por ta, nan sa, no ta bayendo scol, no ta haciendo cos bon den comunidad, y cu e ora ey mester raporta nan.
“Nos tur mester yuda. Nos mester tin extra wowo pa polis, y reporta na nan ora nos mira algo cu nos sa cu ta robes. Nos tur mester tin e curashi ey di yuda tene nos Isla un pais sigur”, LaSorte a expresa.
El a splica cu e dialogo ta sigui. Regularmente tin dialogo entre polis, e teamnan di seguridad, y e security patrol como tambe entre AHATA y Korps Chef y e combersacionnan aki lo sigui.
