Grupo local awor ta enfocando pa proteha parhanan conoci como ‘Bubi’

Advertencia na tur esnan preparando proyecto

ORANJESTAD (AAN): Hopi hende conoce nan como ‘Bubi’, aunke tin algun cu ta ser yama ‘Sterchi Comun’, tambe como ‘Sterchi Grandi’, pero e ta conoci na Hulandes como ‘Sterns’, y na Ingles ta ser yama ‘Terns’.

   E bon noticia ta cu e grupo local di Aruba Birdlife Conservation (ABC) ta preparando pa proteha e Bubinan di Aruba.  Pesey nan ta manda un mensahe pa tur partidonan cu ta preparando proyectonan cu por afecta e Bubi, por fabor percura cu bo proyectonan ta wordo desaroya cu transparencia completo, sosteni pa rapportnan di calidad halto di MER, tambe di EIA, y cu organizacionnan NGO ta wordo envolvi desde prome dia.

   E mensahe aki ta wordo dirigi na tur instancia di Gobierno, pa asina nan evita di cada rato haya nan demanda huridicamente.  Aruba ta cas pa 10 sorto di Bubi.  Pa awor ya caba tur hende na Aruba lo mester conoce nan tur.  Segun Aruba Birdlife Conservation, nan lo bay proteha tur 10 tambe.

   E potret aki di e Bubinan ta bulando, cu a wordo referi durante un entrevista na noticiero di Aldrich Croes na Hits 100.9 FM, a wordo saca na Baby Beach na San Nicolas.  Esakinan ta ‘Sterchi Grandi”.

   E areanan cu ta pinta na cora den e mapa (mapa di ABC, cu ta poni caba den rapport existente di ROPv), ta indica unda e Bubinan di Aruba ta bruy tur aña.  Check esaki cuidadosamente.  Asina nan lo keda vigila di cerca e area di refineria y di Baby Beach tambe.

   Aruba Birdlife Conservation ta spera cu e mensahe aki ta uno formal pa tur instancia envolvi.  Pasobra tolerancia pa destruccion di naturaleza di e isla no ta un opcion mas.

   Esnan protehando parhanan di Aruba, ta haci esey pa nos futuro muchanan por goza di naturaleza tambe.