Casonan hudicial awe
- Prome Caso den Corte di 2026 pa atende coremento burachi
ORANJESTAD (AAN): Corte den Prome Instancia lo trata awe Diaranson e prome zitting pa casonan di alcohol di aña 2026. E casonan den Corte aki lo ta totalmente den cuadro di stuur bao influencia di alcohol. Trinta sospechoso a keda cita pa nan presenta dilanti Hues riba acusacion di a core burachi.
Cu e zitting aki, Ministerio Publico kier pone enfasis cu core bao influencia di alcohol ta nifica peliger di morto. E consecuencianan di core burachi ta dal comunidad di Aruba duro y ta causa masha hopi sufrimento. E simannan nos tras esey a sali dolorosamente na cla. Tur hende por a wak e noticianan tocante e consecuencianan devastador di alcohol den trafico.
Na aña 2025 Minister di Husticia a pone recursonan adicional na disposicion di Ministerio Publico, destina pa combati alcohol den trafico y pa cobra boetnan. Danki na esaki, na 2025 Ministerio Publico por a cita mas di 500 sospechoso dilanti Hues pa core bao influencia di alcohol. Di e manera ey, Ministerio Publico a logra haci un gran paso pa dilanti durante 2025 y e atraso den caso a keda elimina completamente.
E castigonan duna pa core bao influencia ta bin generalmente cu boet halto y prohibicion di stuur. Esey a hiba Ministerio Publico na logra cobra mas di 5,5 miyon Florin na boetnan pa Pais Aruba.
Pa aña 2026 Minister di Husticia a bolbe priminti recursonan adicional na Ministerio Publico pa combati alcohol den trafico y pa cobra boetnan. Esaki ta nifica cu chofernan cu di awor pa dilanti wordo deteni pa Polis pa core bao influencia, lo ricibi un citacion pa presenta dilanti Hues dentro di maximo 3 luna di tempo. Of un convocacion pa un asina yama “TOM-MBI” (Cita cu Fiscal).
E TOM-MBI of Cita cu Fiscal ta encera cu fiscal mes ta trata e casonan. Na aña 2025 a convoca alrededor di 200 persona pa e TOM-MBI, cu a bin den contacto cu Polis pa core burachi. Mas of menos un kwart di nan a keda sin presenta y a ricibi di inmediato un citacion pa presenta dilanti Hues pa duna cuenta.
Alcohol y trafico no ta bay hunto. Ministerio Publico kier mustra Aruba cu infraccionnan lo wordo ataca rapidamente y visibelmente, cu consecuencianan hopi claro. Tur esey cu e meta pa aumenta seguridad riba caminda pa cada ciudadano.
