Grant Thornton ta organiza seminario titula: “Are you ready for 2022?”

ORANJESTAD (AAN)—Den un conferencia di prensa, cu a tuma lugar Diaranzon 1 December, relaciona cu un Seminario cu Grant Thornton ta bay brinda, señor Edsel Lopez tabata presente pa duna informacion.

Lopez a cuminza pa splica cu despues di hopi tempo, esnan di Grant Thornton na Aruba a dicidi atrobe, pa cuminza cu nan seminarionan y esun prome cu ta bay duna lo tuma lugar otro siman Diaranzon 8 di December merdia, na Hyatt Place.

“Den e seminario aki nos kier comparti hopi conocemento y experiencia cu e comunidad Arubiano, muy en particular e comunidad comercial di Aruba.

Temanan cu nos kier trata durante e seminario aki ta, por ehemplo, e capital humano cu ta importante den e comunidad aki, mirando tur e movecionnan cu tin riba tereno di labor. Nos kier toca tambe e tema di ‘compliance’ cu ta un tema cu ta biba  hopi den e comunidad, mas bien den e parti di e comunidad comercial den e aspecto financiero; tambe e tema di cyber security, cu ta hopi actual den nos comunidad”, Lopez a menciona.

Tin cierto leynan cu tambe nan kier trece dilanti y nan lo cuminza cu e tema di impuesto. Manera ta conoci ta bay bin un cambio di BBO pa BTW, y e tema di “compliance” cu ta un tema actual, muy en particular pa e organizacionnan cu ta cay bao e maneho di Banco Central.  

Edsel Lopez a bisa cu e intencion di e seminario ta mas tanto, pa prepara e comunidad comercial pa aña 2022, y e tema di e seminario mes ta: “Are you ready for 2022?” Na final di e seminario lo tin un debate cu un panel, cu representantenan di Banco Central y di e comunidad comercial di Aruba, muy particularmente Camara di Comercio y Industria.

Riba e parti di “Compliance” nan kier wak e perspectiva di e comunidad comercial di Europa, y e perspectiva di Banco Central tambe, cu ta supervisa e sector financiero di Aruba.

Edsel Lopez a extende un invitacion pa participa den e seminario aki, particularmente na e comunidad comercial (Business Community). Registracion ta via Grant Thornton su website. El a conclui bisando cu e ta spera di wak hopi hende interesa den e seminario aki.