Gobierno y sector hotelero no kier tuma responsabilidad pa un problema nacional

Oriana Wouters di IDNOVA riba RZWI:

*Aruba a desaroya discriminando cu naturalesa na existi 

ORANJESTAD (AAN):  Oriana Wouters, Directora IDNOVA  ta splica riba su preocupacion tocante e RZWI (Rioolwaterzuiveringintallatie) na Bubali. El a expresa cu e ta sinti cu Aruba a desaroya discriminando cu naturalesa na existi.

            Wouters a cuestiona:  dicon a desaroya sin tene cuenta cu e concepto ey di tene cuenta cu esnan rond di nos, manera e otro sernan bibo. "Pakico nos ta bisa, ah no, e tereno ta di mi y mi por kita tur loke ta bibo eynan y tur loke mi no ta mira. Anto pone un edificio ariba dje sin considera kico ta e impacto riba e sernan cu ta bibo y esnan cu no ta presente".

            E ta menciona cu aña pasa a keda publica den medionan di comunicacion cu hotelnan no ta responsabel pa e RWZI. Anto e aña aki a bin cu e publicacion cu gobierno no ta responsabel. "Pero con por ta si ta juist e dos institucionnan aki ta esnan cu mas ta haci uzo di RWZI, cu semper eigenlijk lo tabata cargando e responsabilidad a base di tur e publicacionnan cu tin cu ta indica cu e cos aki no ta funcionando bon".

            Den e documentario "Turning the Tide' di Aruba Conservation Foundation nan a indica cu desaroyo incontrola ta impactando medio ambiente mas. Na Aruba tin espacio pa tur ser, sino no lo tabata ricibiendo 1.5 miyon turista pa aña. Pero ta discriminando nos mes y otro sernan cu no tin bos manera fauna y flora.

            Semper ta spera cu como adulto por tuma responsabilidad pa problemanan cu ta surgi den su bida. Pero akinan tin Gobierno y sector hotelero cu ta bisando cu nan no kier tuma responsabilidad pa un problema nacional cu ta impacta e calidad di lama.

            Oriana Wouters a sigui bisa cu esaki no ta algo di awo. Ta algo for di tempo cu e tabata chikito cu ta wak cu e beach tin otro calidad cu otro areanan di Aruba. Di e tempo ey caba tabatin problema cu e RWZI, a remarca.

            For di 1988 ta bisando cu RWZI mester di expansion, di modernisacion. Pero a duna mas urgencia na conecta mas servicionan na e RWZI. Dicon e ora gobierno no ta responsabel, pero ta neglishando esaki tambe.

            Den caso di e sector hotelero, nan ta na Aruba pa crea prosperidad. No pa kita prosperidad for di e pueblo, Wouters a declara.