Parlamentario Evelyn Wever-Croes:
ORANJESTAD (AAN): Despues di a sigui e desaroyonan, cu a cuminsa den oranan tempran despues di mei anochi, en cuanto e sucedidonan na Venezuela, e prome reaccion di Parlamentario Evelyn Wever-Croes diasabra mainta tempran tawata cu tin falta di informacion na Parlamento despues cu Prome Minister Eman a duna su discurso mainta tempran. Segun e representante di pueblo, esaki a trece mas preocupacion ainda.
Parlamentario Wever-Croes a indica cu Fraccion di MEP mesora a haci peticion na Presidente di Parlamento pa yama Gobierno pa un reunion urgente, un Senioren Convent. Segun e parlamentario, nan a haya contesta riba e preguntanan cu nan a haci y varios informacion no por comparti mirando cu ta trata di un Senioren Convent y ta den nivel di secrecia.
Un punto importante di e reunion tawata tocante a cancelacion di buelonan y esnan cu ta pega den exterior. E parlamentario a menciona cu Partido MEP a ricibi hopi yamada di ciudadanonan cu ta desespera pasobra no por a tuma nan biahe bek pa Aruba. Parlamentario Wever-Croes, pa esaki a conseha Prome Minister Eman pa establece un punto di contacto pa asina e personanan aki por haya cierto guia y conceho, manera tawata e caso den tempo di Covid. E parlamentario ta pidi pa tur esnan cu ta den exterior y ta pega ainda, pa keda trankil. Gobierno di Aruba a priminti cu lo establece un punto di contacto pa duna mas informacion.
Un otro pregunta hopi importante cu Fraccion di MEP a haci Gobierno di Aruba ta si tin suficiente alimentacion na Aruba. Gobierno a sigura cu tin suficiente cuminda pa tres luna, tambe awa y gasoline. Esaki e institutonan encarga cu crisis a regla por lo tanto, segun e parlamentario, no tin motibo pa panico, apesar cu e situacion ta serio.
Finalmente, Parlamentario Wever-Croes ta pidi comunidad pa keda trankil y sigui canalnan oficial di noticia y uni den oracion pa pronto bin un solucion pa Venezuela y pa tur. “Union di nos pueblo tawata e exito pa enfrenta tur reto cu nos a encontra, nos a surpasa nan. Awo tambe, cu fe, confiansa y den union,uzando sano huicio, nos lo sali di esaki tambe”, e parlamentario a enfatisa.
Y pa loke ta trata informacion di Gobierno na nos comunidad, Parlamentario Wever-Croes ta bisa cu Gobierno tin di duna mas informacion y ta mas transparente.cu pueblo.
