Gobierno a start ronda di preparacion pa acredita scolnan publico primario pa Erasmus+

Minister Gerlien Croes:

ORANJESTAD (AAN): Gobierno di Aruba, pa medio di e Ministerio di Relacionnan den Reino, Educacion, Hubentud, Innovacion y Deporte, a inicia oficialmente un ronda di preparacion cu como meta pa acredita scolnan publico primario pa participa den e programa Erasmus+.

   E iniciativa aki ta forma parti di un prome fase di e vision pa fortalece internacionalisacion den educacion, ampliando oportunidadnan pa scolnan y maestronan di scol basico, y creando mas intercambio di conocemento, experencia y miho practicanan cu partnernan internacional.

   Cu e proceso di preparacion aki, scolnan publico primario lo wordo guia pa cumpli cu e rekisito y criterianan necesario pa acreditacion, pa asina por aplica y participa activamente den proyecto Erasmus+ den futuro. E ta inclui orientacion riba planificacion, desaroyo di proyecto, colaboracion cu partnernan internacional y e implementacion di actividadnan educativo.

   E Ministerio ta considera e paso aki como un inversion den e futuro di nos muchanan, pa duna nan mas oportunidad pa siña, crece y conecta cu e mundo pafo di Aruba, mientras cu ta fortalece e calidad di enseñansa riba nos isla na mes momento.

   Gobierno ta reitera su compromiso pa sigui traha pa un sistema educativo mas fuerte, moderno y conecta cu oportunidadnan internacional, cu como meta final: miho resultadonan pa tur alumno na Aruba.