Go-Fast cu 900 kilo di droga captura como 580 km panort di Aruba

Persecusion riba lama a dura 7 ora largo - ORANJESTAD (AAN): Investigacion cu autoridadnan na Colombia,

y tambe esnan na Republica Dominicana ta haciendo, ya tin poni preto riba blanco cu mayoria speedboat tipo Go-Fast cu motornan potente, ta sali for di e beach di Bahia Honda cu ta keda na e extremo mas noordoost di Colombia.

   Aki cu monton di paki di droga, nan ta sali sea rumbo pa Centro America, of tambe directo pa Republica Dominicana, y tin biaha pa Islanan ABC, esta Aruba, Bonaire y Curacao.

   Si nan bay Republica Dominicana cu e droga, esaki tin e meta final pa despues e logra bay y drenta Puerto Rico.  Di e forma ey e ta wordo usa como un trampolin pa drenta Merca.

   Si nan bay Islanan ABC, esaki tin como meta final pa e droga aki logra bay y drenta Europa.

   E siman aki, autoridadnan di Control di Droga na Republica Dominicana a logra intercepta un speedboat tipo Go-Fast cu tabata transporta 900 paki di cocaina for di Colombia pa eynan.  E speedboat a pasa pabao di Aruba bay nort.

   Pero e narcotraficantenan aki tabata cla pa un reto!  Nan no a entrega nan mes asina facil.  Pesey mes e intento pa stop nan a dura 7 ora largo.  Unidadnan Dominicano no a rindi tampoco y a sigui nabega cu velocidad halto nan tras, y na final esaki a termina den area pafo di costa di Bahia de Andres cu ta na municipio di Boca Chica, unda e Go-Fast finalmente a pega riba tera.

   Despues di a pega na tera, e tripulantenan a core baha y rek un careda na pia.  Pero na final, autoridadnan a logra di gara nan, pasobra autoridad tabata vigila tur e area di costa di e zona.

   Den e Go-Fast di 40 pia largo cu a yega for di Colombia, tabatin 30 saco grandi.  Cada uno tabatin 30 paki den dje, pa un total di 900.

   Autoridadnan a detene 2 Colombiano y 1 Dominicano y nan ta wordo interoga awor.

   Den nan poder a wordo haya un cartera cu 7 cigaria di marihuana, un satellite phone, dos Outboard Engine di 250HP cada uno, 14 tanki di plastico, y un hemchi.