Geoffrey Wever ta desmenti cu tabatin ‘complot’

ORANJESTAD (AAN): Hopi observador politico no a guli mesora e declaracion di Ministro Geoffrey Wever na nan salida for di Kabinet di Gobernador. 

Ora cu a puntre si Partido RAIZ a haci palabracionnan cu esnan di Oposicion pa asina vota pa un President nobo di Parlamento, el a declara cu esey no ta berdad.

   Pues el a desmenti e acusacion di complot aki, siendo cu ya desde Diadomingo atardi caba e “idea” aki tabata circulando rond di Aruba.  Observadornan pesey no ta kere e estilo di ‘distanciamento’ aki for di e teoria di complot pa asina bula cabez di Edgard Vrolijk y pusha pa Kamperveen haya e puesto.

   Siendo cu den e Acuerdo di RAIZ y MEP pa gobernacion, ta stipula claramente cu ta MEP ta encarga cu Presidencia di Parlamento, y cu RAIZ ta encarga cu Vice-Presidencia.