Geoffrey Wever a tuma su retiro di Plataforma Raiz

ORANJESTAD (AAN): Den un otro noticia cu a sacudi mundo politico, faltando apenas algun luna pa e siguiente eleccion,

Plataforma Raiz a anuncia den medionan social cu Geoffrey Wever a tuma decision pa retira di e plataforma.

Geoffrey Wever tabata encarga cu carteranan di Asuntonan Economico, Comunicacion y Desaroyo Sostenibel durante Gabinete Wever-Croes II.

Segun e comunicado, “Plataforma Raiz ta desea di informa su miembronan, simpatisantenan y publico general cu miembro di partido, Geoffrey Wever a tuma e decision pa retira di e plataforma.

Geoffrey Wever ta un profesional y tabata un miembro importante di nos ekipo, trahando incansablemente ariba nos vision comparti den areanan di economia, desaroyo sostenibel y agricultura innovativo.

Su decision ta uno propio y a wordo tuma a base di un bista diferente di con e como persona ta desea di sigui traha ariba pa nos pais y con politica mester wordo hiba. Raiz ta un Plataforma cu por wordo mira como un incubator unda cu ta fomenta ideanan nobo, innovacion, y desaroyo personal y profesional. Raiz su portanan ta habri pa profesionalnan cu tin vision y gana di cambia nos pais pa miho. Miembronan lo bin y miembronan lo bay haciendo nos plataforma cada bes mas fuerte.

Raiz ta un Plataforma cu por wordo mira como un incubador unda cu a fomenta ideanan nobo, inovacion y desaroyo personal y profesional. Raiz su portanan ta habri pa profesionalnan cu tin vision y gana di cambia nos pais pa mihor.

Durante RAIZ su periodo den gobernacion, nos a mustra a base di ehempel con Gobierno por traha a base di cooperacion y colaboracion, sin distincion di colornan politico. Ningun hende ta indispensabel y semper mester tin espacio na tur esnan cu kier yuda genera cambio y promove ideanan nobo, sea cu nan ta simpatisante di Raiz of no. Esaki ta nos vision pa politica na Aruba, progreso y cambio sin discriminacion politico. Nos a bin pa traha ariba cambio berdadero cu lo permanentemente marca nos cultura politico. Esaki ta permanece nos compromiso y esaki nos lo logra.

Raiz ta desea Geoffrey tur clase di exito cu su siguiente proyectonan y ta gradici’e pa e tempo y energia cu e la dedica na nos causa y pa Aruba. E forsa di Raiz ta su team, cu no ta depende riba un of algun individuo, pero ta un colectivo di miembronan cu e meta comun pa trece cambio structural den politica na Aruba. Nos ta invita tur miembro y simpatisantenan pa activamente participa hunto cu Raiz pa crea e caminda unda bo ideanan lo yuda forma e destino di nos dushi isla Aruba,” e comunicado a finalisa.