Gasolin ta subi awe fuerte cu casi 10 cen pa liter

Efecto di atakenan riba Iran...

ORANJESTAD (AAN): E conflictonan escalando entre Merca cu Israel y Iran, ta treciendo como consecuencia cu cambionan drastico y espantoso pa cu prijs di bari di crudo, e.o. esun di Merca cu ta West Texas Intermediate (WTI), cu a sobrepasa e linea di 100 Dollar pa bari.

   Siman a habri cu prijs di $104,61 cu ta un aumento di 36% compara cu algun siman pasa.  E ta un subida record.  Aunke Dialuna anochi el a cay un tiki y a cera na $94 pa bari.

   Y pesey no ta sorpresa cu prijs di gasolin a subi drasticamente caba na Merca, na Europa, y tambe na algun pais den Lama Caribe.  Esaki no ta prome biaha, pasobra algo similar a socede na 2022 pa e enfrentamentonan entre Rusia y Ucrania.

   Tin algun pais, e.o. Republica Dominicana cu desde 2022 ta subsidiando tarifa di combustibel pa comunidad, tanten cu e prijs di petroleo keda den e rango di $85 te cu $115 pa bari.  Pues ainda crudo di WTI no a sobrepasa $115, pues e subsidio ta sigui na e pais di merengue, y chauffeurnan ta keda paga e mesun tarifa pa gasolin cu ta bayendo 4 aña caba mescos.

   Na Jamaica tambe, e compania Petrojam a anuncia cu e aumento di crudo lo no bay afecta chauffeurnan hopi na e pais.  Pasobra e refinerianan na Jamaica a logra di suavisa e efecto, danki na nan framework di stipula prijs.  E mecanismo di stipula prijs di Petrojam, a mitiga e impacto completo di e aumento mundial di crudo.

   Na Aruba mientras tanto, e isla no tin refineria, pues tin di keda paga pa e costo halto di transporta Gasolin, Diesel, y Kerosine pa e isla.  Pesey riba Diamars mainta, Ministro di Finansa, Asunto Economico y Sector Primario a anuncia cu entrante awe 11 di Maart 2026 lo tin aumento di prijs pa Aruba.

   Awe Diaranson, prijs di Gasolin tipo Unleaded-Premium lo subi cu 9,8 cen, pa wordo bendi awor na 223,4 cen pa liter.

   Prijs pa combustibel Diesel Ultra Low Sulphur (ULS) lo subi cu 8,5 cen, pa wordo bendi awor na 201,4 cen pa liter.

   Prijs pa Kerosine ta subi cu 10,7 cen, pa wordo bendi awor na 192,3 cen pa liter.  Tur e prijsnan ta inclui BBO/BAZV/BAVP.

   Aunke e aumento ta tiki fuerte cu casi 10 cen pa liter di Unleaded, toch algun observador a keda asombra cu e no a subi cu 18 cen of mas e siman aki.  Pa awor, 10 cen ta un tiki aceptabel y automobilistanan lo tin di djis trata di ta mas eficiente ora di core e dianan aki.