Gabinete Wever-Croes a cambia e rumbo financiero di Aruba y a establece fundeshi financiero fuerte pa e isla

Rating upgrade di S&P na A- pa Aruba ta confirma

ORANJESTAD (AAN): Parlamentario y ex-Minister di Finansa, Xiomara Maduro, ta felicita pueblo di Aruba cu e subida historico di Aruba su rating financiero door di Standard & Poor’s Global Ratings (S&P), di BBB+ pa A- cu perspectiva stabiel.

  Maduro ta enfatisa cu e resultado aki ta un señal cla cu Aruba su finanzas publico a wordo maneha cu disciplina y vision. E ex Minister di Finansa ta enfatisa: “Esaki no ta casualidad. Esaki ta resultado directo di liderazgo fuerte y decisionnan responsabel di Gabinete Wever-Croes.”

  Segun e informe di S&P, Aruba a logra surplus fiscal, debe a wordo reduci significativamente, interes di debe a baha y confianza internacional den Aruba a crece.

   Desde 2022, mas cu 600 miyon Florin di debe a wordo paga, poniendo Aruba den un posicion financiero mucho mas fuerte.

   Parlamentario Maduro ta destaca, cu despues di e pandemia di COVID 19, Gabinete Wever-Croes a sa di restablece disciplina fiscal, controla gasto di gobierno y gana confianza internacional.

   “Den un momento dificil, nos a scoge pa lidera cu responsabilidad, y awe nos ta mira e resultado: un Aruba cu ta mas fuerte, mas stabiel y cu mas respet internacional. Si nos keda riba e rumbo aki, Aruba lo sigui avansa. Pero si disciplina fiscal wordo laga un banda, nos por perde tur e progreso aki.” Maduro ta enfatisa.

   E subida pa A- ta confirma cu Aruba tin un fundeshi financiero solido, y esaki ta danki na e politica consistente di Gabinete Wever-Croes, na e seriedad cu a atende cu e reto financiero, y e trabao haci den ekipo na bienestar di Aruba.

   “Hopi cu awe ta gaba cu e logro historico aki, tabata critica nos trabaonan TUR dia, pero awe un biaha nan mester acepta cu ta demostra cu nos trabao ta keda duna resultado positivo pa Aruba,” ta palabranan expresa pa Parlamentario y ex Minister di Finansa Xiomara Maduro.