Fundacion Epilepsia Aruba no ta ricibiendo apoyo di Gobierno

Maryla Solognier, vicepresidente:

• Tin un comision cu ta traha duro pa organiza nan encuentronan 

ORANJESTAD (AAN):  Maryla Solognier, Vicepresidente di Fundacion Epilepsia Aruba, a sigui splica den su entrevista cu “Nos Mainta” na Telearuba, cu rond di e malesa di Epilepsia tin hopi pensamento straño; hasta cu e persona tin diabel den su curpa, pero, eigenlijk, tin diferente causa, y entre otro, e por bin di famia tambe.

“Si ta bin di famia, e persona tin mas chens di hay’e, sea di su tata, su mama, of un famia cercano”, señora Solognier a señala.

El a aclarea tambe cu, den mayoria di e casonan, e no ta un malesa mortal. E por sosode, pero den mayoria di e casonan e persona ta recupera bek.

El a splica tambe, cu si e persona cu haya ataca ta kita cay, esun cu kier yud’e no mester lant’e su so, pero mester busca ayudo. No laga e persona su so, pero keda cu ne. Wak cuanto minuut ta dura pa duna informacion y keda alerto tambe. Pidi ayudo si un atake ta bay 4 of 5 minuut of e persona ta haya mas atake, busca ambulance p’e.

Iniciativanan nobo:

Señora Solognier a duna di conoce cu for di aña pasa a cuminza cu encuentronan social. Aña pasa tabata tin dos, y e Fundacion kier sigui cu esaki.

“Nos a ripara cu e hendenan kier papia di loke nan tin, trec’e padilanti, y expresa nan sentimentonan, kico e persona a pasa aden, por ta na trabao of den famia, etc”, e dama a relata.

El a agrega cu den futuro nan kier bin cu mas encuentro y ideanan pa sigui traha riba esey, no lag’e cay, sigui duna informacion y bin cu charlanan.

Nan ta duna e personanan aki hopi apoyo, pasobra e Fundacion t’ey pa scucha. “E aña aki nos ta bay dedica mas tempo na esey, na scucha e persona y sa kico e ta pasando aden, y pa esnan eyfo compronde cu e no ta un situacion facil, di ningun manera. Y laga e persona na palabra pa otronan scuch’e tambe, kico ta pasa cu ne”, señora Solognier a indica.

Maryla Solognier a comenta tambe cu e Fundacion no ta hayando, actualmente, ningun apoyo di gobierno. Nan tin un comision cu ta trahando hopi duro pa sigui dilanti, y nan mes ta purba organiza nan encuentronan, etc. Nan kier organiza un Congreso y pa bin na esey, mester di fondonan tambe.