The content originally appeared on:
Diario
ORANJESTAD (AAN): Dialuna mainta DIARIO a entrevista Winston Tavares presidente di Fundacion Dominicana Arubanse Juan Pablo Duarte, relaciona cu e situacion financiero di e fundacion.
“Nos ta pasando den momentonan financiero hopi critico y nos kier a alerta comunidad cu si nos no pone man na obra y traha hunto pa salba e fundacion, e fundacion lamentablemente lo no existi mas”.
Actualmente caba nos no tin coriente, telefon a wordo corta e huur di e lugar ta atrasa, segun Tavares.
DIARIO a puntra e presidente di e fundacion si e tin un suma den mente, cu ta locual ta necesario pa atende cu e problema y el a indica cu 4000 florin ta locual tin mester di dje aworaki pa cumpli cu e debenan di e fundacion.
Pa loke ta un plan pa rescata e fundacion, Tavares a splica cu a largo plazo tin diferente actividad planea, pero a corto plazo mester busca un solucion financiero.
“Den luna di Mei nos a purba di bin cu algun curso y esey no a bay”.
Tambe nos a purba di huur e edificio cu hunta central electoral Dominicano, pero nan a bay Playa Pabao.
Banda di esaki nos a busca alternativanan cerca diferente instancia y persona y nos a logra haya un tiki ayudo, pero aworaki e situacon ta hopi mas critico, segun e presidente di e fundacion.
Esnan cu kier yuda Fundacion Dominicana Arubanse Juan Pablo Duarte por yama 592-1679 of 562-30 93.
“Nos ta haci un apelacion na nos miembronan cu pa un motibo of otro a aleha di e fundacion, pa bin cas bek”.
Esaki segun Tavarez kende a indica cu e fundacion semper tabata yuda entre otro cubri gastonan di entiero pa hende y yuda cu paketenan di cuminda pa esnan den necesidad.
“Nos kier sigui tey pa yuda comunidad di Aruba, segun Tavarez.
