Fundacion ABO y Departamento di Salud ta uni forza pa fortalece cuido preventivo di cancer na Aruba

ORANJESTAD (AAN): Riba Dia Internacional di Cancer di boca di matriz,

Fundacion ABO a tene un conferencia di prensa pa anuncia un otro paso importante den e desaroyo di cuido preventivo na Aruba.

            Nanine Ponson, Directora di ABO a indica cu e colaboracion cu el a presenta ta entre ABO y Departamento di Salud Publico (DVG) ta importante den e maneho di salud di e poblacion den forma strategico y calcula.

            E laso entre ABO y DVG no ta nobo. ABO a nace for di Stichting BOB Aruba y di DVG na 2012. Hunto cu otro stakeholders e tempo ey, AZV y Hospital, Stichting BOB Aruba a bira e iniciado na Aruba di e deteccion tempran di malesa cronico, esta cancer di pecho, el a bisa.

            Durante 12 aña, Stichting BOB a fungi como e organisacion central pa amplia e programanan di deteccion tempran di cancer di pecho. Awor cu a bira ABO ta bay cuminsa cu screening di cancer di tripa y screening di cancer di boca di matriz, Ponson a indica.

            Fundacion ABO a nace na october 2024 y e programanan BOCA y CORESA a haya nan inicio. Cu casi 10 aña di e programa di BOB, no tin duda cu CORESA y ABO ta bay ta un exito y ta bay tin na balor agrega riba nivel individual mescos cu BOB, el a agrega.

            Directora di ABO a sigui bisa cu un di e metanan principal di e programanan aki tambe ta pa siña for di dje. "Nos kier sa diferente otro cos band'i e ayudo na e clientenan. Nos kier sa tambe si e resultado ta representativo pa nos pueblo. Si e edadnan cu nos a scoge ta edad cu mayoria di cancer ta presenta su mes".

            Pa ABO ta e edad entre 45 cu 75 aña, mescos tambe pa CORESA y pa e programa di BOCA ta entre 24 aña y 65 aña, el a splica. Nan kier sa di e edadnan aki ta representativo na e presentacion di e malesanan den e populacion. Ki tipo di cancer, ki tipo di tumornan ta presenta y con e programa ta afecta e mortalidad di e poblacion.

            Esaki ta e tipo di preguntanan epidemiologico cu lo wordo contesta cu e colaboracion aki entre Fundacion ABO y DVG.

            A base di esaki y di e informacion cu tambe ta haya for di Hospital, por ehempel riba e tipo di cancernan cu ta detecta den un forma anonimo, ta spera di por yega na e datonan desea pa por contesta e preguntanan cu tin, Nanine Ponson a declara.

            E datonan cu ta colecta ta cu consentimento explicito di tur participante. E datonan ta wordo procesa den forma anonimo pa asina DVG por funciona den su rol supervisor. ABO tambe ta mantene na e reglanan di privacidad di cada participante, el a indica.

            Awendia ABO ta duna servicio di screening di cancer di pecho, boca di matriz y tripa grandi. Tambe "nos a bira un socio strategico pa salud publico na Aruba", Ponson a expresa.