Fundacion a crea un software pa yuda hende tuma decision pa ken kizas bo tin di vota

ORANJESTAD (AAN): E asina yama Fundacion Fuente a presenta un herment-digital pa votado di Aruba, e proyecto Stemwijzer ta back cu un sistema sofistica den guia di voto.

   Varios partner y compania local cu ta kere den e movimento imparcial democratico aki ta sostene Votaruba.org cu e fin pa e votado Rubiano por haci un voto bon informa y trece adelanto den nos manera di vota a base di emocion of vota di forma partidista.

   E herment aki lo ta disponible entrante 9 di Juni riba website di www.votaruba.org

    E siguiente eleccion na Aruba lo tuma lugar riba 25 di Juni, 2021. Den e contexto aki, un Stemwijzer electoral a worde desaroya, esta votaruba.org. Esaki ta un sosten brinda na e votado na caminda pa eleccion.

   Votaruba.org ta un herment digital cual despues di contesta algun proposicion, ta mustra e usuario cual partido ta identifica mas cu ne basa riba ideologia. Den e resultadonan, e usuario por orienta su mes mas extensivo riba e posicionan di tur partido y revisa tur otro informacion.

   E Proyecto di Stemwijzer, votaruba.org, ta un colaboracion entre stichting Fuente y ProDemos. Fuente ta un colectivo di studiantenan Arubiano y hobennan profesional cu ta biba na Hulanda, pero ainda ta carga un amor grandi pa nan isla. ProDemos ta e desaroyador di e Stemwijzer na Hulanda y ta traha cu organizacionan rond di mundo. ProDemos ta un fundacion independiente, 100% confidencial y neutral, cu e meta pa informa hende y involucra nan den e proceso democratico, na unda privacidad di votador ta worde salvaguardia.

   E relacion di cooperacion ta basa riba compromiso di miembronan di Fuente riba un base boluntario, hunto cu e infrastructura digital y expertisio di ProDemos.
   Cuater aña atras e prome Stemwijzer pa Aruba a worde desaroya. Na 2017, tur partido politico Arubano a provee informacion y ultimamente e Stemwijzer digital a worde uza mas cu 11,000 biaha (e cantidad di personanan cualifica pa vota den e ultimo eleccionnan na Aruba tabata 70,000).

   Durante ultimo eleccionnan, nos a mira con hendenan pa prome biaha a cuminsa discuti nan diferencianan abiertamente den posicionnan entre partidonan politico. Pa Stichting Fuente y votaruba.org, esaki ta locual ta mas importante.

   Nan ta invita tur persona cu derecho di voto na Aruba pa haci uzo di votaruba.org y conose cual ta e partido cu ta comparti e mesun opinion cubo ariba asuntonan di importancia pa nos pais. Ora cu completa e encuesta bo lo ricibi resultado di e 3 partidonan cu tin mas en comun cu bo punto di bista. E posicion mas halto riba e lista ta e partido cu tin mas similaridad den respuesta.

   Votaruba.org ta solamente un parti di un decision conciente durante eleccion. Por fabor consulta e programanan politico, debate y otro fuente di informacion pa haya un bista completo di tur e posicionan di e partidonan politico.